ايگىلى مەريلين مونرونىڭ ەسسىز تابىنۋشىسى ونى ءمايىتحانادا سۋرەتكە تۇسىرگەن
نۇر- سۇلتان. قازاقپارات – ەرلەر قاۋىمىن ەستەن تاڭدىرعان تانىمال اكتريسا مەريلين مونرونىڭ ءمايىتحاناداعى سۋرەتتەرى پايدا بولدى.
تانىمال اكتريسانى كوز جۇمعاننان كەيىن ونىڭ ەسسىز تابىنۋشىلارىنىڭ ءبىرى فوتوعا تۇسىرگەن بولىپ شىقتى. بۇل تۋرالى امەريكالىق Fox News ارناسىندا كورسەتىلگەن دەرەكتى فيلمنەن بەلگىلى بولدى دەپ جازادى woman.ru سايتىنا سىلتەمە جاساعان KAZ. NUR. KZ.
مونرونىڭ ومىردەن وتكەنىنە جارتى عاسىرداي ۋاقىت وتسە دە، ونىڭ ومىرىنە قاتىستى دەرەكتەر قالىڭ كوپشىلىككە ءالى دە قىزىق.
Fox News ۇسىنعان فيلمدە تانىمال اكترياسىنىڭ اسا بەلسەندى تابىنۋشىسى بولعان لي ۆيننەر ەسىمدى فوتوگراف تۋرالى ايتىلدى. انىقتالعانداي، ول مەريلين مونرونى ءمايىتحانادا جاتقان جەرىنەن سۋرەتكە ءتۇسىرىپ العان.
ەر ادام ءوزى ءۇشىن ۇلگى بولعان كينو جۇلدىزعا اقتىق ساپارعا اتتانباس بۇرىن، سوڭعى فوتوسەسسيا جاساپ بەرۋدى ماقسات ەتكەن.
بۇل ويىن ىسكە اسىرۋ جولىندا ول الدىن الا جوسپار قۇرعانى بەلگىلى بولدى. الدىمەن ۆينەر ءمايىتحانا كۇزەتشىلەرىنە اسا باعالى ىشىمدىك ۇسىنىپ، اكتريسانىڭ دەنەسى جاتقان بولمەگە كىرۋگە رۇقسات العان.
مەريليننىڭ ءولى دەنەسىن سۋرەتكە ءتۇسىرۋ ءۇشىن لي ۆيننەر بەس پلەنكالى كاسسەتانى الا بارعان. ازامات ولاردىڭ بارلىعىن قولدانىپ، ايگىلى اكتريسانى قالاعان تۇسىنان سۋرەتكە تۇسىرگەن.
ۆيننەر تۇسىرگەن سۋرەتتەرىنىڭ جارتىسىن امەريكالىق باسىلىمدارعا ساتىپ، قالعانىن وزىندە قالدىرعان.
ونىڭ سوزىنشە، بەس پلەنكانىڭ ەكەۋى تولىعىمەن مونرونىڭ اشىق دەنەسىنىڭ سۋرەتتەرىنە تولى بولعان. بۇل سۋرەتتەردى فوتوگراف ءومىرىنىڭ سوڭىنا دەيىن ەشكىمگە كورسەتپەي كەتكەن. سۋرەتتەر ءتىپتى، ەر ادامنىڭ ولىمىنەن كەيىن دە تابىلماعان.
