قىتاي اۋەجايىندا ۇشاق ورتەندى

بەيجىڭنىڭ حالىقارالىق اۋەجايىندا قىتايدىڭ Air China اۋە كومپانياسىنىڭ ۇشاعى ورتەندى، دەپ حابارلايدى Independent.

كۋاگەرلەر الەۋمەتتىك جەلىلەردە اۋەجايداعى وقيعانىڭ سۋرەتتەرىمەن ءبولىسىپ جاتىر. كادردان قىتايلىق اۋە كومپانياسىنىڭ Airbus 330 ۇشاعىنان شىققان ءتۇتىندى كورىنەدى.

باسىلىمنىڭ حابارلاۋىنشا، وقيعا جولاۋشىلاردى CA183 رەيسىنە وتىرعىزۋ كەزىندە بولعان. ول بەيجىڭنەن توكيوعا ۇشۋى ءتيىس بولاتىن.

ۇشاق اۋەجايدىڭ تراپىنا ءتۇيىسىپ تۇرعان كەزدە سالوندا ءتۇتىن شىققان. اۋە كەمەسىنىڭ كومانديرى بىردەن قوزعالتقىشتى ءسوندىرىپ، ەكيپاج جولاۋشىلاردى جەدەل ەۆاكۋاتسيالادى. ەشكىم زارداپ شەككەن جوق.

Airbus 330-دىڭ جۇك سالاتىن بولىگىنەن شىققان ورتتەن ۇشاقتىڭ فيۋزەلياجى زاقىمدانعان.

باسىلىمنىڭ اقپاراتىنا سايكەس، اۋە كومپانياسىنىڭ اكىمشىلىگى تەكسەرۋ جۇمىسى باستالعانىن حابارلادى.