ەلوردادا جولاقى قىمباتتاي ما: كولگىنوۆتىڭ جاۋابى
«قوعامدىق كولىك قاتىناسىنا ەنگىزىلگەن ونلاين تولەم مەن كارتوچكا جۇيەسىن پارمەندى شارا دەپ اتاۋعا بولادى. اشىقتىق پەن ترانسپارەنتتىلىك ارقاسىندا كولەڭكەلى ەكونوميكانىڭ ۇلەسى ازايدى. ارينە، قازىرگى تاريفتىڭ شىعىنى كوپ. سوندىقتان، سۋبسيديا تولەپ وتىرمىز. ءدال قازىر، 2019-جىلدىڭ سوڭىنا دەيىن ءتاريفتى كوتەرۋ جوسپاردا جوق»، - دەدى التاي كولگىنوۆ.
سونداي-اق ەلوردا اكىمى ءبىر اۆتوبۋستان ەكىنشىسىنە تەگىن اۋىسىپ وتىرۋ رۇقساتىن الىپ تاستاۋ مۇمكىندىگىنە قاتىستى سۇراققا جاۋاپ بەردى.
«تەگىن اۋىسىپ وتىرۋعا كەلەتىن بولساق، ول قازىر بار. رەفورما اياسىندا ونىڭ ءوزىن-ءوزى قانشالىقتى اقتايتىنىن قاراۋىمىز كەرەك. ويتكەنى، اۆتوبۋستاردى كۇتىپ ۇستاۋ ءبىزدىڭ مىندەتىمىزگە كىرەدى. ۇنەمى قوسالقى بولشەكتەرىن جاڭالاپ، جۇرگىزۋشىلەرگە ايلىق تولەۋ قاجەت. جانارماي ساتىپ الۋ سياقتى وزگە دە شىعىندار بار. ەكونوميكانى دا ەسەپتەيمىز. سودان كەيىن عانا شەشىم قابىلدايمىز»، - دەدى قالا باسشىسى.
بۇدان بولەك، ول استانا ىرگەسىندەگى قوسشى ەلدى مەكەنىنىڭ ۇلعايۋى جانە ونىڭ قالاداعى قوعامدىق كولىك قاتىناسىنا اسەرى جونىندە ايتتى.
«قوسشىدا تۇرعىن ءۇي الابى بارعان سايىن اۋقىمىن ارتتىرىپ كەلەدى. ءبىز قازىر قوعامدىق كولىككە ۇلكەن قاجەتتىلىك پايدا بولعانىن سەزىنىپ وتىرمىز. ويتكەنى، قوسشىدا تۇرىپ، ەلوردادا جۇمىس ىستەيتىندەردىڭ سانى وتە كوپ. دەسە دە، ەلوردانىڭ قوعامدىق كولىكتەرىن دامىتۋ ءۇشىن كوپ جۇمىس اتقارىلعانىن ەسكەرۋ كەرەك. بىرىنشىدەن، اۆتوپاركتىڭ باسىم بولىگى جاڭارتىلدى. بۇل قۋانتارلىق جايت. اسىرەسە، ءبىزدىڭ قاتاڭ شۇعىل كونتينەنتتى كليماتىمىز ءۇشىن بۇل وتە ماڭىزدى. جىلى ايالدامالار سالىنىپ جاتىر.
ءبىز «استانا LRT» كولىك كومپانياسىنا ءاربىر پروبلەمالى ۋچاسكەمەن جۇيەلى تۇردە اينالىسۋعا شاقىردىق. قاجەت بولسا، قوسىمشا مارشرۋتتار اشىپ، اۆتوبۋستار جۇكتەمەسىن ازايتۋ كەرەك. ال ءوزىن-ءوزى اقتامايتىن مارشرۋتتاردى سۋبسيديالاۋىمىز قاجەت. سوندىقتان، ءماسليحاتتىڭ تاياۋداعى سەسسياسىندا سۋبسيدياعا قوسىمشا 2 ميلليارد تەڭگە بولدىك. ءبىراق بۇل جەتكىلىكسىز»، - دەگەن اكىم قالادا اۆتوبۋس جۇرگىزۋشىلەرى جەتپەي جاتقانىن ەسكە سالدى.
«الداعى ۋاقىتتا سۋبسيديالاۋعا 9 ميلليارد تەڭگە قاجەت بولادى. ويتكەنى سەرۆيس ساپاسى بويىنشا ماسەلەلەر بار. جۇرگىزۋشىلەردىڭ جۇكتەمەسى اۋىر ەكەنىن مويىنداۋ كەرەك. ەسىڭىزدە بولسا، قوعامدىق كولىك جۇرگىزۋشىنىڭ ءولىمى تىركەلگەن بولاتىن. مۇنىڭ ءبارى جۇمىسقا دەگەن كوزقاراسقا، قىزمەت كورسەتۋ ساپاسىنا بايلانىستى. سوندىقتان، قازىر جۇرگىزۋشىلەر تاپشىلىعى بار» - دەدى ول.
