قارقارالىدا الاش ارىستارىنا ەسكەرتكىش ورناتىلدى
ەسكەرتكىش تۇڭعىش پرەزيدەنت - ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسى اياسىندا اۋداندا اتقارىلاتىن 19 جوبانىڭ ءبىرى رەتىندە جۇزەگە اسىرىلىپ وتىر. وتكەنىمىز ەسكەرىلىپ، ورتامىزعا ورالعان تۇستا، ەلىمىزدىڭ ەگەمەندىگى جولىندا اياۋسىز تەر توككەن تۇلعالارىمىز وسىلايشا ارداقتالدى.
قازاق حالقى - تەكتى حالىق، رۋحى مىقتى، دۇنيەتانىمى كەڭ، پايىم- پاراساتى مول ۇلىلارىن ۇلىقتاۋدان تانعان ەمەس. ال، قارقارالى جەرىندەگى الاش قايراتكەرلەرىنىڭ كەسەك تۇلعالارى سومدالعان ەسكەرتكىش - رۋحاني قۇندىلىق، تاريحتان سىر شەرتەتىن جادىگەر. تاعدىر توعىستىرىپ، قازاق حالقىنىڭ بولاشاعى سىنعا تۇسكەن شاقتا «الاشىم» دەپ الاسۇرعان، ازاتتىقتىڭ اق تاڭىن اڭساپ وتكەن ارىستاردىڭ قۇرمەتىنە قويىلعان ەسكەرتكىشتىڭ اشىلۋ سالتاناتىندا اۋدان اكىمى حالەل ماقسۇتوۆ جيىلعان قاۋىمدى اقجارىلا قۇتتىقتادى.
- دوڭگەلەك ستول باسىندا حالقىنىڭ جارقىن بولاشاعىن تۋرالى ءسوز ءوربىتىپ وتىرعان ءالىمحاندى ۇستامدى دا سابىرلى ءاليحان جاعىن تايانىپ، ءۇنسىز ويعا شومىپ تىڭداسا، احاڭ ءالىمحاننىڭ كوزىنەن ۇشقىنداعان وتتى كورگەندەي مۇقيات دەن قويىپ وتىر، - دەگەن اۋدان باسشىسى ۇلى تۇلعالاردىڭ بار بولمىسىن اشىپ تۇرعان تۇتاس كومپوزيتسيانىڭ تاريحي جانە تاربيەلىك ءمانى تۇرعىسىنان وتە قۇندى تۋىندى ەكەنىن ايتىپ ءوتتى.
ەسكەرتكىشتىڭ جوباسىن قاعاز بەتىنە العاش تۇسىرگەن جەرگىلىكتى تالانتتى سۋرەتشى ساكەن داۋلەتبايەۆ، مۇسىنشىلەر - تالعات بايورازوۆ پەن كەنجەبەك قوشانتايەۆ. ەسكەرتكىش قولادان قۇيىلعان، بيىكتىگى - 3,15 م، سالماعى - 2 توننا.
سالتاناتتى شارادا الىس- جاقىننان كەلگەن قۇرمەتتى قوناقتار - بىرنەشە اۋداندا باسشىلىق قىزمەت جاساعان امانتاي راحيموۆ، تاريح عىلىمدارىنىڭ دوكتورى، پروفەسسور ساتاي سىزدىقوۆ، فيلولوگيا عىلىمدارىنىڭ دوكتورلارى، پروفەسسورلار، ايتىسكەر اقىندار - امانجول التايەۆ، قويلىباي اسانوۆ، اقتوعاي اۋدانى اكىمىنىڭ ورىنباسارى ابىلاي امانجولوۆ، ەڭبەك ارداگەرى سەرىك جەكەيەۆ، سونداي-اق تاريحشى ۇستاز قايرات وماربەكوۆ وزدەرىنىڭ جىلى لەبىزدەرىن ءبىلدىردى.
ءيسى قازاقتىڭ ازاتتىعى ءۇشىن كۇرەسكەن ارىستاردىڭ رۋحىنا ارنالىپ اس بەرىلدى.
