بەس رەت مەشىت توناعان كۇدىكتى ۇستالدى - الماتى وبلىسى
«2019 -جىلدىڭ 16 -17- شىلدەسىندە جامبىل اۋداندىق پوليتسيا ءبولىمىنىڭ كەزەكشىلىگىنە ەكى ارىز تۇسكەن. ءبىرىنشى جاعدايدا بەيتانىس ازامات يمامعا ءوزىنىڭ جۇمىس ىزدەپ جۇرگەنىن العا تارتىپ، ۋاقىتشا مەشىتتە قالۋعا رۇقسات سۇراعان. ال يمام كەتىپ قالعان كەزدە ول قۇلىپتى بۇزىپ، قايىرىمدىلىققا تۇسكەن قاراجاتتى ۇرلاپ، بوي تاسالاعان. ەكىنشى جاعدايدا، ۇرى تۇندە مەشىت جابىلمايتىنىن پايدالانىپ، وعان تاڭعى ساعات 5-تە كىرىپ، قۇلىپتى بۇزۋ ارقىلى تاعى دا قايىرىمدىلىققا تۇسكەن قاراجاتتى ۇرلاپ كەتكەن. قىلمىس ورنىنان كەتىپ بارا جاتىپ، وسى كوشەدەگى جەكە ۇيلەردىڭ ءبىرىنىڭ اۋلاسىنان ۆەلوسيپەد ۇرلاعان»، - دەلىنگەن الماتى وبلىستىق پوليتسيا دەپارتامەنتىنىڭ باسپا ءسوز قىزمەتى تاراتقان اقپاراتتا.
ءبىر ايعا سوزىلعان ىزدەستىرۋ بارىسىندا كۇدىكتى قولعا ءتۇستى. ۇستالعان 22 جاستاعى ازاماتتىڭ تۇرعىلىقتى مەكەن- جايى جوق، جۇمىسسىز.
تەكسەرۋ بارىسىندا كۇدىكتى بۇرىن وڭتۇستىك قازاقستان، قازىرگى تۇركىستان وبلىسىندا ۇرلىق جاساعانى ءۇشىن ۇستالعانى انىقتالدى. ءبىراق سوت ونىڭ ىسىنە قاتىستى تاراپتاردىڭ تاتۋلاسۋىنا بايلانىستى توقتاتىلعان. تەرگەۋ بارىسىندا ۇستالعان ازاماتتىڭ ۇمبەتالى، قاينازار، ەڭبەكشى اۋىلدارىنداعى ءۇش مەشىتتەگى ۇرلىققا قاتىسى بار ەكەنى انىقتالدى. «ولاردىڭ بارلىعى تۇنگى ۋاقىتتا قايىرىمدىلىققا ارنالعان جاشىكتەردىڭ قۇلىپتارىن بۇزۋ ارقىلى جاسالعان. كۇدىكتىنىڭ بوتەن مۇلىكتى ۇرلاۋدىڭ 6 فاكتىسىنە قاتىسى بار. ونىڭ بەسەۋى مەشىتتەردە بولعان. بارلىق شىعىندار ەسەپتەلۋدە. سوتقا دەيىنگى تەرگەۋ ءجۇرىپ جاتىر»، - دەپ تولىقتىردى اتالعان ۆەدومستۆو قىزمەتى.
اۆتور: سامال قابىشيەۆا
