ولگا رىپاكوۆا «گاۋھار ليگاسىنىڭ» فينالىنا قاتىسۋدان باس تارتتى

نۇر-سۇلتان. قازاقپارات - جەڭىل اتلەتيكادان قازاقستان كومانداسىنىڭ ۇزدىگى، ءۇش قارعىپ سەكىرۋدەن وليمپيادا چەمپيونى ولگا رىپاكوۆا «گاۋھار ليگاسىنا» قاتىسۋدان باس تارتتى.

بۇل تۋرالى ول Instagram-داعى پاراقشاسىندا جازدى، دەپ حابارلايدى قازاقپارات.

ول الەم چەمپيوناتىنا دايىندىقتى بارىنشا كۇشەيتۋ ءۇشىن وسىنداي قادامعا بارعان.

«سىزدەردىڭ پىكىرلەرىڭىزدى وقىعان سايىن، سپورتشىعا جانكۇيەردىڭ قولداۋى قانشالىقتى ماڭىزدى ەكەنىن تۇسىنەمىن. پاريجدە ءساتسىز ونەر كورسەتتىم - 14,16 مەتر. «گاۋھار ليگاسىنىڭ» فينالدىق كەزەڭىنە وتسەم دە، فينالعا قاتىسۋدان باس تارتتىم. سەبەبى، الەم چەمپيوناتىنا دايىندىققا كوبىرەك كوڭىل بولگىم كەلەدى. پاريجدەگى كورسەتكىشكە كەلەر بولسام... سپورتشىلار مەنى تۇسىنەدى: ۇدايى جاڭا بيىكتى باعىندىرعىڭ كەلەدى. ءتىپتى، بۇل ءوز دەنساۋلىعىڭا زيان بولسا دا. بەلوكۋريحادا ەم العان سوڭ، بىردەن پاريجدەگى جارىسقا كەتتىم. ءالى تولىق ەمدەلىپ ۇلگەرمەگەنىم سەكىرۋ بارىسىندا بايقالدى. دەسە دە، مۇنىڭ ۇلكەن تاجىريبە بولعانىن مويىندايمىن. بارلىقتارىڭىزعا جىلى سوزدەرىڭىز بەن قولداۋلارىڭىز ءۇشىن العىس ايتامىن. الدا الەم چەمپيوناتى مەن توكيوداعى وليمپيادا ويىندارى كەلە جاتىر. سول سىنداردا ءبىز مىندەتتى تۇردە جاقسى ناتيجە كورسەتەمىز. باستىسى -  ەڭسەنى بيىك ۇستاپ، دايىندىقتى جالعاستىرۋ»، - دەپ جازدى رىپاكوۆا.

سپورتشى پاريجدەگى ايگىلى «گاۋھار ليگاسى» تۋرنيرىنىڭ فينالىنا وتكەنىن بۇعان دەيىن جازعان بولاتىنبىز.