ارمەنيا، قىرعىزستان ەلىنىڭ ءنومىرى بار كولىكتەردى ونلاين ءارى تەگىن تۇردە تىركەۋ جۇيەسى ىسكە قوسىلادى
«كۇن سايىن ىشكى ىستەر ورگاندارى شەتەلدىك تىركەۋدەگى كولىك قۇرالدارى يەلەرىنىڭ قاتىسۋىمەن بولاتىن جۇزدەگەن جول-كولىك وقيعاسىن تىركەيدى. مۇنداي جول اپاتتارىنىڭ ارتى ولىمگە دە اپارىپ جاتادى. 2018-جىلى عانا شەتەلدىك تىركەۋدەگى كولىكتەردىڭ قاتىسۋىمەن 42 مىڭ جول-كولىك وقيعاسى تىركەلسە، وسى جىلدىڭ باسىنان بەرى 50 مىڭ جاعداي ورىن الدى»، - دەلىنگەن حابارلامادا.
مينيسترلىكتىڭ حابارلاۋىنشا، بۇگىن عانا اقتوبە وبلىسىندا وسىعان ۇقساس جاعداي بولعان. ناقتىراق ايتقاندا، ارمەنيا مەملەكەتتىڭ ءنومىرلى مينيۆەن جۇرگىزۋشىسى كولىك تىزگىنىنە يە بولا الماي، جول شەتىنە اۋناپ كەتكەن. اپات سالدارىنان ءبىر ادام كوز جۇمىپ، جەتى ادام ءارتۇرلى جاراقات العان. جۇرگىزۋشىنىڭ ءوزىن جەدەل جاردەم قىزمەتكەرلەرى اۋرۋحاناعا جەتكىزگەن.
«سول سەكىلدى الماتى وبلىسىنداعى «الماتى-بىشكەك» اۆتوجولىندا قىرعىز رەسپۋبليكاسىندا تىركەلگەن كولىكتى ايداپ كەلە جاتقان جۇرگىزۋشى جولدىڭ قاراما-قارسى بەتىنە شىعىپ كەتىپ، قارسى كەلگەن كولىكپەن بەتپە-بەت سوقتىعىسقان. سالدارىنان ءۇش ادام قايتىس بولىپ، جەتەۋى اۋرۋحاناعا جەتكىزىلگەن»، - دەپ حابارلايدى مينيسترلىكتەن.
ءى ءى م- ءنىڭ اقپاراتتىق بازاسىندا ول كولىكتەر تۋرالى مالىمەت جوق بولعاندىقتان، وكىنىشكە قاراي جول اپاتىنىڭ ايىپكەرىن جەدەل جاۋاپكەرشىلىككە تارتۋ مۇمكىن بولماي جاتادى. وسىعان بايلانىستى، ءبىزدىڭ ەلدە پايدالانۋ مەرزىمى ۇزارتىلعان جاعدايدا ە ا ە و- عا مۇشە مەملەكەتتەردە تىركەلگەن كولىكتەردى مىندەتتى ۋاقىتشا تىركەۋ ماسەلەسى جولعا قويىلماق.
«بۇل جەردە اتالعان كولىك قۇرالدارىن ءبىرجولاتا پايدالانۋعا تىيىم سالۋ نەمەسە قانداي دا ءبىر شەكتەۋ قويۋ، سالىق تولەتۋ تۋرالى ايتىلىپ تۇرعان جوق. ماسەلە ۋاقىتشا تىركەۋگە بايلانىستى. اۆتوكولىك يەلەرى كولىكتەرىن ونلاين تۇردە تەگىن تىركەتە الادى»، - دەلىنگەن حابارلامادا.
وسىلايشا، شەتەلدىك كولىكتەردى تىركەۋ ارقىلى جول-كولىك وقيعاسى بولعان جاعدايدا اۆتوماتتى جۇيە ارقىلى تانۋعا بولادى. ودان ارى ەرەجە نەمەسە زاڭ بۇزۋشىنى اكىمشىلىك جانە قىلمىستىق جاۋاپكەرشىلىككە تارتۋعا جول اشىلادى.
