ق ر سىرتقى ىستەر ءمينيسترى بارسەلوناداعى قىلمىستىڭ جيىلەپ كەتكەنىن ەسكەرتتى
بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ مالىمدەدى.
«كاتالونيا ورتالىعىندا ۇرلىق پەن توناۋ جيىلەپ كەتكەنىنە نازار اۋدارامىز. بىرنەشە كۇن بۇرىن كاتالونيا پوليسياسى بارسەلونانىڭ تۋريستىك ايماقتارىندا قىلمىستىڭ وسكەنى تۋرالى مالىمدەمە جاسادى. پوليسيانىڭ مالىمەتىنشە تەك بارسەلونا كوشەلەرىندە وسى جىلى 5331 توناۋ ارەكەتى جاسالعان. بارسەلوناداعى ق ر كونسۋلدىعىنىڭ مالىمەتىنشە، 2019 -جىلدىڭ العاشقى جارتى جىلىندا زارداپ شەككەن ازاماتتار سانى ەكى ەسەگە ارتتى» ، - دەدى ايبەك سمادياروۆ ق ر س ءى م وتكەن بريفينگتە.
2019 -جىلدىڭ ءبىر عانا شىلدە ايىندا قازاقستانعا قايتىپ ورالۋعا 24 ءتولقۇجات بەرىلگەن.
«كوپتەگەن ادامدار ءتولقۇجاتتان جانە شەنگەن ۆيزاسىمەن ساياحاتتى جالعاستىرۋ مۇمكىندىگىنەن ايىرىلۋدا، سونىمەن قاتار ولار جەكە زاتتارىن، اقشالاي قاراجاتى مەن باسقا ماتەريالدىق قۇندى بۇيىمدارىن جوعالتادى. وسىعان بايلانىستى بارسەلونادا قۇجاتتارىڭىز بەن زاتتارىڭىزعا ساق بولۋلارىڭىزدى سۇرايمىز. ەلگە ۇشىپ كەتەر الدىندا قۇجات ۇرلانعانىن نەمەسە قۇجاتتاردى قالپىنا كەلتىرۋ فاكتىسىن راستايتىن حاتتاما الۋدى جانە وقيعا بولعان جاعدايدا جاقىن ماڭداعى پوليسيا ۋچاسكەسىنە جۇگىنۋگە كەڭەس بەرەمىز» ، - دەدى ق ر س ءى م رەسمي وكىلى.
