نازاربايەۆ سايلاۋدى ماجوريتارلىق جۇيەمەن وتكىزۋ كەرەك دەيتىندەرگە جاۋاپ بەردى
«2018-جىلى سايلاۋ زاڭناماسىن جەتىلدىردىك. ءماسليحاتتاردىڭ كەلەسى سايلاۋى العاش رەت پارتيالىق ءتىزىم بويىنشا وتكىزىلەيىن دەپ وتىر. ءماسليحاتتىڭ كەلەسى سايلاۋى ماجىلىستەگىدەي پارتيالىق تىزىممەن وتەدى. جەكەلەگەن وپپونەنتتەردىڭ نەمەسە بلوگەرلەردىڭ مەرزىمىنەن بۇرىن پارلامەنت سايلاۋىندا ماجوريتارلىق جۇيەسىنە ورالۋدى جانە تاعى باسقالاردى ۇسىنىپ جاتقانىن ەستىپ وتىرمىز. بۇگىن مۇنداي ءسوز سويلەۋشىلەرگە جاۋاپ بەرۋ قاجەت»، - دەدى ەلباسى.
قازاقستان تۇڭعىش پرەزيدەنتى سايلاۋدىڭ ماجوريتارلىق جۇيەسىنە كوشۋدى قولداپ جۇرگەندەردىڭ ناقتى ۇسىنىستارى جوق ەكەندىگىن باسا ايتتى.
«بۇل جەردە نەگىزدى ارگۋمەنتتەرى جوق، ادەتتەگىدەي تەك قانا اڭگىمە عانا. بيلىكتى سىناپ سويلەگەندەرى بوس ءسوز عانا. تىم بولماسا بىرەۋى قالاي ىستەۋ كەرەكتىگىن ۇسىنىپ، قالاي جاساۋ كەرەكتىگىن كورسەتسە عوي. دەموكراتيانىڭ شامشىراعى دەپ جۇرگەن ەۋروپاداعى 30 دامىعان ەلدىڭ قاتارىنا كىرەتىن مەملەكەتتەردىڭ 63 پايىزى سايلاۋدى پروپورتسيونالدى جۇيەمەن وتكىزەدى»، - دەدى نۇرسۇلتان نازاربايەۆ.
ەلباسىنىڭ ايتۋىنشا، ماجوريتارلىق جۇيەدەگى سايلاۋ نەگىزىنەن ازيا ەلدەرىنە ءتان بولىپ كەلەدى.
«ياعني، پروپورتسيونالدى جۇيە ۇزدىك الەمدىك دەموكراتيالىق تاجىريبەگە تولىق ساي كەلەدى. ساياسي جۇيەنى نىعايتۋعا، دەموكراتيانى دامىتۋعا سەپتىگىن تيگىزىپ، تولىقتاي العاندا ساياسي پارتيانىڭ قىزمەتىن جانداندىرادى»، - دەدى ەلىمىزدىڭ تۇڭعىش پرەزيدەنتى.
