شەتەلدىك جۋرناليستەر ياساۋي كەسەنەسىمەن تانىستى

تۇركىستان. قازاقپارات - تۇركىستان قالاسىنا شەتەلدىك تىلشىلەر كەلىپ، قوجا احمەت ياساۋي كەسەنەسىمەن تانىستى، دەپ حابارلايدى قازاقپارات.

ب ا ق وكىلدەرىنىڭ قاتىسۋىمەن وتكەن مادەني باسپا ءسوز- تۋرىنىڭ ماقساتى - ەلباسى نۇرسۇلتان ءابىش ۇلى نازاربايەۆتىڭ «رۋحاني جاڭعىرۋ» باعدارلاماسىنىڭ «جاھانداعى زاماناۋي قازاقستاندىق مادەنيەت» جوباسىن حالىقارالىق دەڭگەيدە ناسيحاتتاۋ.

ق ر سىرتقى ىستەر مينيسترلىگى مەن مادەنيەت جانە سپورت مينيسترلىگى، تۇركىستان وبلىسى اكىمدىگىنىڭ ۇيىمداستىرۋىمەن وتكەن ساپار بارىسىندا UNESCO تىزىمىنە ەنگەن قوجا احمەت ياساۋي كەسەنەسى جانە ونداعى جادىگەرلەرمەن تانىسقان ب ا ق وكىلدەرى جەراستى قىلۋەتى، جۇما مەشىتىن دە ارالادى.

اۋستريا، گەرمانيا، يتاليا، كورەيا، قىتاي، مىسىر، ۇلى بريتانيا، ءۇندىستان، فرانسيا، شۆەتسيا، شۆەيتساريا سىندى مەملەكەتتەردىڭ، اتاپ ايتقاندا «Specchio Economico» (يتاليا)، «Global Times» (قىتاي)، «Le Figaro» (فرانسيا)، «Korean Broadcasting System» تەلەارناسى (كورەيا)، «The Holiday Magazine» (ۇلى بريتانيا) 20 عا جۋىق جۋرناليست «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ديرەكتورى احمەتجانوۆ نۇربولات قادىر ۇلى جانە ارحەولوگ مامانداردان سۇحبات الىپ، پىكىر الماستى.

«جاھاندىق الەمدەگى قازىرگى قازاقستاندىق مادەنيەت» جوباسى شەڭبەرىندە ءتورتىنشى رەت وتكەن باسپا ءسوز تۋرى تۋريزمدى دامىتۋ جانە جالپى قازاقستاننىڭ دامىپ كەلە جاتقان مەملەكەت رەتىندەگى وڭ يميدجىن قالىپتاستىرۋعا باعىتتالعان.