ەۋروپانىڭ ءبىر توپ جيھانگەزى قازاقستاننىڭ كيەلى ورىندارىن ارالاپ شىقتى

نۇر-سۇلتان. قازاقپارات - ەۋروپا ەلدەرىندەگى قازاقستاننىڭ دوستارى اتانعان ءبىر توپ جيھانگەز «ۇلى دالا ەلىندە» اتتى ەكسپەديتسيا قۇرامىندا قازاقستاننىڭ كيەلى جەرلەرىن ارالاپ شىقتى.

جيھانگەزدەر 4 مىڭ شاقىرىم جەردى باسىپ وتكەن، دەپ حابارلايدى قازاقپارات ءتىلشىسى.

ساپاردى قازاقستان مەن اۆستريا ەلشىلىكتەرى، قازاق گەوگرافيالىق قوعامى ۇيىمداستىرعان.

قازاقستاننىڭ ەۋروپالىق دوستارى قازاقستاننىڭ قاسيەتتى جەرلەرىن - ۇلىتاۋ، قارقارالى، شىڭعىستاۋ، الاكول، التىن ەمەل مەن بالقاش وڭىرلەرىن كورىپ شىقتى. ەكسپەديتسياعا قازاقستاننىڭ بەلگىلى جيھانگەزى، قازاق گەوگرافيالىق قوعامىنىڭ مۇشەسى، قازاقستاننىڭ 100 جاڭا ەسىمىنە ەنگەن ماعجان ساعىمبايەۆ جەتەكشىلىك ەتكەن.

«ءبىز 14 كۇننىڭ ىشىندە 4 مىڭ شاقىرىم جولدى، بىرنەشە وبلىستى باسىپ وتتىك. اتاپ ايتقاندا، قاراعاندى، اقمولا، شىعىس قازاقستان، الماتى، جامبىل وبلىستارى مەن الماتى، نۇر-سۇلتان قالالارىندا بولدىق. ۇلىتاۋدا جۇرگەنىمىزدە ەكسپەديتسيامىزعا ە ق ى ۇ- نىڭ قازاقستانداعى ەلشىسى دجوردج سابو مەن شۆەيتساريا ەلشىسى و. سميت قوسىلدى. جوشى حان مەن الاشا حاننىڭ، دومباۋىلدىڭ كەسەنەسىن ارالاپ، قارقارالى ۇلتتىق پاركىندە دە بولدىق. شايتانكول دوستارىمىزعا قاتتى ۇنادى. وسىدان كەيىن اباي اۋدانىندا جيدەبايداعى اباي مۋزەيىن تاماشالادىق. جيدەبايدا ە ى ق ۇ پارلامەنت اسسامبلەياسىنىڭ بۇرىنعى پرەزيدەنتى كريستين مۋتتونەن ابايدىڭ «جاز» ولەڭىن نەمىس تىلىندە وقىپ، ۇلى اقىننىڭ 175 جىلدىعىنا وراي باستالعان چەللەندجگە ءۇن قوستى»، - دەدى ماعجان ساعىمبايەۆ.

ونىڭ ايتۋىنشا، اۆتريالىق قوناقتار گەرولد بەلگەر اۋدارعان ابايدىڭ «جاز» ولەڭىنىڭ كوشىرمەسىن اباي مۋزەيىنە تاپسىرىپ، قازاقتىڭ ۇلى اقىنىنىڭ رۋحىنا قۇرمەت كورسەتكەن.

«اباي اۋدانىنان كەيىن الاكولگە، ودان ارى التىن ەمەلدەگى تاۋلارعا شىقتىق. بەسشاتىر قورعانىندا بولىپ، وشاقتاسقا دا جولىمىز ءتۇستى. ارى الماتىنى اينالىپ، نۇر- سۇلتانعا كەلدىك. وسى 14 كۇننىڭ ىشىندە ەلباسى جازعان «ۇلى دالانىڭ جەتى قىرىن»، ۇلى دالانىڭ قاسيەتىن سەزىندىك. مەيمانداردى ۇلتتىق داستۇرىمىزبەن، تۋريستىك الەۋەتپەن تانىستىردىق. مەنىڭ ويىمشا، ەكسپەديتسيا ءساتتى ءوتتى»، - دەدى ماعجان ساعىمبايەۆ.

دەلەگاتسيا قۇرامىندا شەتەلدىك تۋريستەرمەن بىرگە قازاقستاننىڭ اۆسترياداعى توتەنشە جانە وكىلەتتى ەلشىسى قايرات سارىباي، پارلامەنت دەپۋتاتى ساپار احمەتوۆ، قازاقستاننىڭ بادەن-ۆيۋرتەمبەرگ جەرىندەگى قۇرمەتتى كونسۋلى دوروتەيا حاللەر-ليايبلە مەن جارى يۋرگەن ليايبلە، اۆستريا-قازاقستان قوعامىنىڭ پرەزيدەنتى، ە ق ى ۇ پارلامەنت اسسامبلەياسىنىڭ بۇرىنعى پرەزيدەنتى كريستين مۋتتونەن جانە ونىڭ جارى پەككا مۋتتونەن بولدى.

ەسكە سالا كەتسەك، اتالمىش ەكسپەديتسياعا جەتەكشىلىك ەتكەن ماعجان ساعىمبايەۆ وسىدان ءتورت جىل بۇرىن جەر شارىن ۆەلوسيپەدپەن ارالاپ شىققان بولاتىن.