پارلامەنت سپيكەرى قىزمەتتىك ۇشاقپەن تۋىستارىن تاسىمالداعانى ءۇشىن قىزمەتىنەن كەتتى
نۇر-سۇلتان. قازاقپارات - مارەك كۋحتسينسكي پولشانىڭ بۇقارالىق اقپارات قۇرالدارىنىڭ وكىلدەرى ونىڭ ۇكىمەت ۇشاعىمەن ءوزىنىڭ تۋىستارىن تاسىمالداعانىن جازعاننان سوڭ قىزمەتىنەن كەتتى، دەپ حابارلايدى قازاقپارات polskieradio.pl. سايتىنا سىلتەمە جاساپ.
جۇما، 9- تامىز كۇنى كەشكىسىن مارەك كۋحتسينسكيدىڭ وتستاۆكاسىنان سوڭ سەيم سپيكەرى لاۋازىمىنا پولشا اكىمشىلىگىنىڭ بۇرىنعى ىشكى ىستەر ءمينيسترى ەلجبەتا ۆيتەك تاعايىندالدى. وعان 245 دەپۋتات داۋىس بەردى.
ال پولشانىڭ پرەمەر-ءمينيسترى ماتەۋش موراۆەتسكي مەملەكەتتىڭ ماڭىزدى تۇلعالارىن تاسىمالداۋدى ۇيىمداستىرۋ تۋرالى جاڭا زاڭ ازىرلەۋ جونىندە شەشىم قابىلدادى. بۇل تۋرالى مينيسترلەر كەڭەسى ءتوراعاسىنىڭ كەڭسە باسشىسى ميحايل دۆوريك ءمالىم ەتتى. ول ۇشۋلارعا قاتىستى زاڭدا كوپ ماسەلەلەردىڭ ناقتىلانباعاندىعىن ايتتى.
«مەملەكەتتىك ماڭىزدى تۇلعالاردىڭ ۇشاقپەن ۇشۋ ماسەلەسى ءتۇرلى قۇقىقتىق اكتىلەرمەن رەتتەلىپ كەلگەن. ال ولار بىرنەشە مارتە وزگەرىسكە ۇشىراعان»، - دەدى ميحايل دۆوريك.
سونىمەن قاتار ول زاڭ جوباسىنىڭ نەگىزگى مىندەتتەرىنە توقتالدى. ياعني، پرەمەردىڭ كەڭسەسى رەەستر جۇرگىزىپ، شەنەۋنىك ۇشقاننان كەيىنگى بىرنەشە كۇننەن سوڭ ونىڭ قانداي ماقساتپەن قايدا ۇشقانى جانە بورتتا قانشا ادام بولعانى جونىندە اقپاراتتار جاريالانادى.
«بۇل زاڭ ساياسي كوزقاراس قايشىلىعىنا قاراماستان دايىندالۋى كەرەك»، - دەدى ميحايل دۆوريك.
«ءبىز سونىمەن قاتار وسى ىسكە بارلىق پارلامەنتتىك كلۋبتاردى، ياعني وسى ساياسي پارتيالار اتىنان وكىلدىك ەتەتىن ازاماتتاردى دا تارتامىز»، - دەدى ول.
زاڭ جوباسىن دايىندايتىن ساياساتكەرلەردىڭ ءبىرىنشى كەزدەسۋى الداعى دۇيسەنبىدە، 12- تامىز كۇنى وتەدى.
