عاسىر جاساعان قارياعا اۋىلداستارى ات مىنگىزىپ، شاپان جاپتى

جاركەنت. قازاقپارات - ىرگەسىندە جەتى عاسىردان استام ۋاقىت جايقالىپ كيەلى اعاش ءوسىپ تۇرعان الماتى وبلىسى جاركەنت قالاسى ماڭىنداعى اۋليەاعاش اۋىلىندا ءجۇز جاسقا كەلگەن اقساقال تۇرادى، دەپ حابارلايدى قازاقپارات ءتىلشىسى.

ءبىر عاسىر جاساعان اقساقالدىڭ ەسىمى - تۇراعالدى جاقسىلىق ۇلى. جۇت جىلدارى اۋىلداستارىمەن بىرگە شەكارا اسىپ، اۋىپ كەتكەن قىتاي جەرىنەن تاريحي وتانىنا 1955 -جىلى ورالعان. سودان 1983 -جىلى قۇرمەتتى ەڭبەك دەمالىسىنا شىققانشا وسى اۋىلدا تابان اۋدارماي عۇمىر كەشىپ، مال باققان. اۋىل شارۋاشىلىعىندا قاجىرلىلىقپەن ەتكەن جەمىستى ەڭبەگى ءۇشىن وسىنداعى لەنين اتىنداعى سوۆحوزدىڭ اكىمشىلىگى تاراپىنان تالاي رەت مورالدىق جانە ماتەريالدىق ىنتالاندىرۋ سىيلىقتارىنا يە بولعان. اتا كاسىپتىڭ قىر- سىرىن جەتىك بىلەتىن قايراتتى قاريا زەينەتكە شىققان سوڭ دا سوڭعى جىلدارعا دەيىن اتتان تۇسپەي، بالالارىنىڭ قات- قابات شارۋاسىنا باس- كوز بولىپ كەلگەن.

تۇراعالدى اقساقال 2012 -جىلى ومىردەن وتكەن جۇبايى شولپان اجەيمەن ءبىر شاڭىراق استىندا 67 جىل وتاسقان. ەكەۋى 12 ۇل- قىز ءوسىرىپ، ولاردان 36 نەمەرە، 67 شوبەرە، 3 شوپشەك وربىتكەن. بالالارىنىڭ الدىنىڭ ءوزى اق ساقالدى، اق سامايلى اجە اتانىپ، ودان كەيىنگىلەرى دە قوعامىمىزعا لايىق ازاماتتار بولىپ ءوسىپ، ومىردەن ءوز ورىندارىن تاپقان. ولاردىڭ اراسىندا ورتانشى ۇلدارىنىڭ ءبىرى يگەنباي ۇزاق جىلدار بويى جەرگىلىكتى باسقارۋ ورگاندارىندا قاجىرلى قىزمەت ەتىپ، اۋىل اكىمى بولدى.

اۋليەاعاش اۋىلىنىڭ جۇرتشىلىعى تاياۋدا ءجۇز جاساعان تۇراعالدى قاريانىڭ مەرەيتويىن ۇلكەن قۋانىشپەن اتاپ ءوتتى.

ۇلكەناعاش اۋىلدىق وكرۋگىنىڭ اكىمى ەرمەك ەركىن ۇلى نۇراحمەتوۆ وكرۋگ تۇرعىندارى اتىنان اقساقالعا ارنايى قۇتتىقتاۋ تاپسىرىپ، شاپان جاپتى. اۋىلداستارى ات مىنگىزىپ، كوپتەگەن سىي- سياپات جاسادى. توي سوڭىندا تۇراعالدى اقساقال ەل- جۇرتتىڭ اماندىعىن تىلەپ، اق باتاسىن بەردى.

اۆتور نۇرادىل بەگىمبەت