بەيجىڭ «قىتايعا باج سالىعىن وسىرەمىن» دەگەن ترامپتى سوكتى
كەشە، 1- تامىزدا پرەزيدەنت ترامپ Twitter پاراقشاسىنا «ءبىر ايدان سوڭ، قىركۇيەكتەن باستاپ قىتايلىق تاۋارلارعا سالىناتىن باج سالىعى 10 پايىزعا، 300 ميلليارد دوللارعا وسەدى» دەپ جازعان. پرەزيدەنتتىڭ سوزىنشە، جاڭا تولەم ەندىگى 25 پايىزدىق سالىق ەنگىزىلگەن تاۋارلارعا قوسىلمايدى. امەريكالىق دەلەگاتسيانىڭ تاياۋدا قىتايعا كەلىسسوزگە بارىپ كەلگەنىن ايتقان ترامپ « بەيجىڭنىڭ ۆاشينگتون ۇسىنعان ساۋدا كەلىسىمىن وزگەرتۋگە تىرىسقانىنا قاپالىمىن» دەپ جازعان.
2- تامىزدا ترامپ مالىمدەمەسىنە جاۋاپ بەرگەن قىتاي سىرتقى ىستەر مينيسترلىگىنىڭ رەسمي وكىلى حۋا چۋنين «ا ق ش- تىڭ بۇل قادامى وساكادا جەتكەن مامىلەگە كەرى اسەر ەتەدى. بۇل - تۋرا جولدان تايۋ، ماسەلەنى شەشۋدىڭ بۇرىس امالى. بۇعان اسا نارازىمىز، كوڭىلىمىز مۇلدەم تولماي وتىرعانىن بىلدىرەمىز. ا ق ش باج سالىعىن تاعى وسىرسە، قىتاي دا حالىق مۇددەسى ءۇشىن قارسى شارالار قابىلداۋعا ءماجبۇر بولادى. مۇنىڭ سالدارىنا ا ق ش جاۋاپتى بولادى» دەدى.
بيىل 29- ماۋسىمدا قىتاي باسشىسى شي جينپيڭ مەن ا ق ش پرەزيدەنتى دونالد ترامپ جاپونيانىڭ وساكا قالاسىندا كەزدەسىپ، «ساۋدا سوعىسىن شەشۋ ءۇشىن» كەلىسسوزدى قايتا باستاۋعا ۋاعدالاسىپ، ۆاشينگتون باج سالىعىن ەندى وسىرمەۋگە كەلىسكەن.
1- تامىزدا وتكەن باسپا ءسوز جيىنىندا ترامپ مالىمدەمەسىنە جاۋاپ بەرگەن چۋنين «قىتاي ساۋدا سوعىسىندا ەشكىم جەڭبەيدى دەپ سانايدى. ءبىزدىڭ سوعىسقىمىز كەلمەيدى. ءبىراق ەشكىمنەن قورىقپايمىز دا. قىتاي سىرتتان كەلەتىن قىسىمعا قاراپ تۇرمايدى، قوقان-لوققى مەن ۇركىتۋگە توزبەيدى. نەگىزگى ماسەلەلەرگە كەلگەندە ايتقانىمىزدان قايتپايمىز» دەدى.
ا ق ش پەن قىتاي اراسىندا ساۋدا سوعىسى بىلتىر باستالعان. اۋەلى ترامپ «ادىلەتسىز ساۋدا جاسايدى» دەپ قىتايدان كەلەتىن كەيبىر تاۋارعا باج سالىعىن وسىرگەن. بەيجىڭ دە ۆاشينگتونعا تاپ سولاي جاۋاپ قاتتى. ەكى ەل ساۋدا كەلىسىمىنە 2019-جىلى قول قويۋى كەرەك ەدى. الايدا ترامپ «قىتاي كەلىسىمدى بۇزدى» دەپ، قىتايلىق بارلىق تاۋارعا باج سالىعىن ۇلعايتىپ تاستادى. بەيجىڭ بۇل جولى دا كەيبىر امەريكالىق تاۋارعا سالىقتى وسىرگەن.