«نۇرلى ەرتىس» باعدارلاماسى نە بەرەدى
كوشتى قابىلداپ الۋشى تاراپ ب ا ق وكىلدەرىنە ول جاقتا باعدارلاماعا قاتىسشۋىلار قانداي جەڭىلدىكتەرگە يە بولاتىنىن ايتتى، دەپ حابارلايدى قازاقپارات ءتىلشىسى.
بۇگىن ەكىباستۇزعا اتالمىش باعدارلاما بويىنشا 35 وتباسى قونىس اۋدارعان بولاتىن. بۇل كوشتى پاۆلودار وبلىسىنىڭ الەۋمەتتىك باعدارلامالاردى ۇيلەستىرۋ باسقارماسىنىڭ باسشىسى قايرات نۇرماعامبەتوۆ باستاپ بارماقشى.
«بۇگىن 35 جانۇيانى كوشىرىپ اكەتەمىز. ونىڭ 24 ى كوپبالالى. جالپى جيىنى 208 ادامدى بىرنەشە اۆتوبۋسپەن اپارامىز. «نۇرلى ەرتىس» باعدارلاماسى بويىنشا 1 -مامىردان بۇگىنگە دەيىن نۇر-سۇلتاننان ەكىباستۇز قالاسىنا 102 وتباسى كوشىپ باردى. 600 ادام قازىر قونىستارىنا جايعاسىپ، ەرەسەكتەرىنىڭ جارتىسىنان استامى جۇمىس تاۋىپ ۇلگەردى. باعدارلاماعا ىلىگۋ ءۇشىن ول جاقتا تاپشى ماماندىق بويىنشا جۇمىس ىستەۋگە كەلىسۋ كەرەك بولادى. باستى شارت وسى. ال بالا سانى 4 كە جەتپەيتىن وتباسىلارعا ەكى بولمەلى پاتەر بەرەمىز. كوپبالالى وتباسىلارعا 3 بولمەلى ۇسىنىپ وتىرمىز»، - دەيدى اكىمدىك وكىلى.
«نۇرلى ەرتىسكە» قاتىسۋشىلار «تۇرعىن ءۇي قۇرىلىس جيناق بانك» سالعان كىرپىش ۇيلەرگە جايعاستىرىلىپ جاتىر.
«باسىندا بۇل ۇيلەر باسقا باعدارلاما بويىنشا سالىنعان بولاتىن. ءبىراق ونى بانكتىڭ شارتى بويىنشا الۋعا نيەتتىلەر تابىلمادى. سوندىقتان «نۇرلى ەرتىس» باعدارلاماسىنا باعىتتاعانبىز»، - دەيدى قايرات نۇرماعامبەتوۆ.
باسقارما باسشىسى اتالمىش وتباسىلارعا ەكىباستۇزدا قانداي جاعداي جاسالاتىنىن دا ايتتى.
«قونىس اۋدارۋشىلار ءۇشىن كوتەرمە وتەم رەتىندە ادام باسىنا 88500 تەڭگە تولەنەدى. ءبىر جىل بويى كوممۋنالدىق تولەمدەر مەن ارەندا اقىسىن مەملەكەت تولەپ بەرەدى. ءبىر جىل وتكەننەن كەيىن عانا وزدەرى تولەي باستايدى. ارەندا قۇنى پاتەردىڭ اۋدانىنا بايلانىستى. ەگەر پاتەر 99 شارشى مەتر بولسا، ايىنا 14 مىڭ تەڭگە شىعادى دەگەن ءسوز. ەكى بولمەلى ۇيگە 10 مىڭ تەڭگەدەي بولادى. وعان 15 مىڭ تەڭگە كوممۋنالدىق تولەمدەردى قوسىڭىز. ارەندا ءۇشىن تولەگەن سوما ءۇيدى ساتىپ الۋ سوماسىنا تۇسە بەرەدى. ياعني بەس جىلدان كەيىن ول ءۇيدى جەكەمەنشىككە راسىمدەۋ مۇمكىندىگى بار دەگەن ءسوز»، - دەيدى قايرات نۇرماعامبەتوۆ.
اۆتور: ەسىمجان ناقتىباي