الماتىداعى كوپقاباتتى ءۇيدىڭ قابىرعاسى تۇركى سيمۆولىمەن ارلەندى

الماتى. قازاقپارات - الماتىدا مونۋمەنتالدى ونەردىڭ «MURAL FEST» IV حالىقارالىق فەستيۆالى اياقتالدى، دەپ حابارلايدى قازاقپارات ءتىلشىسى.

فەستيۆال اياسىندا نازاربايەۆ پەن بوگەنباي باتىر كوشەلەرىنىڭ قيىلىسىنداعى ءۇيدىڭ قاسبەتىندە ەتنيكالىق بەلگى پايدا بولدى.

بۇل تۋرالى فەستيۆال كۋراتورى ءمولدىر بەكجان Instagram پاراقشاسىندا جاريالادى.

«بولتىرىگىن قورعاعان قۇرتقانىڭ سۋرەتى سالىندى. بولتىرىك ادام بەينەسىندە سالىندى. ەسكيز اۆتورى بەلگىلى سۋرەتشى مۇحيت اقانايەۆ. ول ادام مەن تابيعاتتىڭ بىرلىگىن ايتقىسى كەلدى. قاسقىر تۇركى زامانىنان بەرى ءبىزدىڭ توتەم جانۋارىمىز بولىپ كەلەدى»، - دەدى ءمولدىر بەكجان.

سۋرەتتىڭ تومەنگى جاعىندا كونە تۇركى جازباسى مەن «ءتاڭىرى» دەپ جازىلعان. ەجەلگى رۋنا جازباسى ورتالىق ازيادا ءبىزدىڭ داۋىرىمىزدەگى VIII- X عاسىرلارىندا قولدانىلعان.

سۋرەتتى جاس ونەرپازدار امانقۇل نۇربولات پەن كەڭەس بەكبولات جۇزەگە اسىردى.