سەمەيدە اباي شىعارماشىلىعى تۋرالى جاڭا كىتاپ جارىق كوردى
فيلوسوفيا عىلىمىنىڭ كانديداتى، ابايتانۋشى، عالىم اسان وماروۆتىڭ باسشىلىعىمەن جارىق كورگەن كىتاپ ەكى تومنان تۇرادى. ءبىرىنشى تومى - ابايدىڭ ءار جىلدارى جازىلعان ولەڭدەرىنە ارنالسا، ال ەكىنشى تومىنا اقىننىڭ قارا سوزدەرى مەن پوەمالارى ەنىپ وتىر.
كىتاپتا ابايدىڭ 200-گە جۋىق ولەڭىنىڭ جازىلعان جىلدارى رەتتەلىپ، توپتاستىرىلعان. سونداي- اق، كىتاپتا اباي قۇنانباي ۇلىنىڭ ءار ولەڭى قاشان، قالاي جازىلعانى تۋرالى مالىمەت پەن ولەڭ مازمۇنىنا تۇسىنىكتەر بەرىلگەن.
«مۇنداي جيناق ابايدىڭ 150 جىلدىق مەرەيتويىندا جارىققا شىققان. سودان بەرى 25 جىل ۋاقىت ءوتىپتى. وسى جىلدار ىشىندە اقىننىڭ جاڭا ولەڭدەرى تابىلىپ، جاڭارتۋ قاجەت بولدى. وسى ماقساتتا ابايدىڭ 175 جىلدىعى قارساڭىندا جيناقتى جاڭا شىعارمالارمەن تولىقتىرىپ شىعارۋدى ماقسات تۇتتىم. بۇل باستامانى قولعا العانىما 3 جىل ۋاقىت بولدى. مىنە، بۇگىن بەرەكەلى ءىس ءوز جەمىسىن بەرىپ، ەكى تومدىق كىتاپ جارىق كورىپ وتىر. كىتاپتىڭ باستى ەرەكشەلىگى - اقىننىڭ ءاربىر ولەڭىنە تۇسىنىك بەرىلگەن. كۇنى بۇگىنگە دەيىن اباي ولەڭدەرىنىڭ حرونولوگياسى دۇرىس بەرىلمەي، ولەڭدەرى جيناقىلىق تاپپاعان. مەن ءار ولەڭىنىڭ جازىلعان جىلدارىنا قاراي توپتاستىرىپ بەرۋگە تىرىستىم. جالپى، كىتاپتى 7 كەزەڭگە ءبولدىم. وقىرمان كىتاپتى وقي وتىرىپ، ابايدى جاس اباي، بالا اباي، جىگىت اباي، ويشىل اباي، ۇستاز اباي دەپ جەكەلەي تاني الادى. ازىرگە 100 دانامەن ءوز قاراجاتىما شىعارعان بۇل كىتاپتىڭ تارالىمى كوبەيەتىنىنە سەنىمدىمىن»، - دەدى ا. وماروۆ.
ايتا كەتەيىك، كىتاپ سەمەيدىڭ «ينتەللەكت» باسپاسىنان شىعىپ، وقىرمانعا جول تارتتى.