بەلجايلاۋدىڭ تورىندە مالشىلار مەرەكەسى ءوتتى - الماتى وبلىسى
قازىر اۋدان بويىنشا 22 مىڭ جىلقى، 90 مىڭ ءىرى قارا، 402 مىڭ قوي- ەشكى، 316 تۇيە، 257 شوشقا، 94 مىڭ قۇس وسىرىلۋدە. بۇل - ارينە، ەڭ الدىمەن مالشى قاۋىمىنىڭ ەسەلى ەڭبەگىنىڭ ناتيجەسى. سونىمەن قاتار ۇكىمەت تاراپىنان جۇزەگە اسىرىلىپ جاتقان باعدارلامالار اياسىندا نەسيە جولىمەن مال ساتىپ الىپ، يگىلىگىن كورىپ جاتقان مالشىلار دا از ەمەس. اۋدانداعى بىرنەشە جەكە شارۋالىق قوجالىق بيىل «سىباعا» باعدارلاماسى بويىنشا 105 ميلليون تەڭگەگە - 191 ءىرى قارا، 42 ميلليون تەڭگەگە - 1565 ۇساق مال ساتىپ الۋعا نەسيە راسىمدەدى. مال شارۋاشىلىعىنىڭ ونىمدىلىگىن جانە ونىڭ ساپاسىن ارتتىرۋدى سۋبسيديالاۋ بويىنشا 41 شارۋا قوجالىعى 37 ميلليون 767 مىڭ تەڭگە الدى.
جالپى، جىلدىڭ ءتورت مەزگىلىندە دە ۋاقىتپەن ەسەپتەسپەي ەڭبەك ەتىپ، ەل بايلىعىن ەسەلەپ ارتتىرۋعا سۇبەلى ۇلەس قوسىپ جۇرگەن مال شارۋاشىلىعى ەڭبەككەرلەرىنىڭ قاجىرلى قارەكەتى قاشان دا قۇرمەتتەۋگە لايىق. وسىنى ەسكەرە وتىرىپ، اۋدان اكىمدىگى ارنايى سالتاناتتى مەرەكەلىك شارا وتكىزۋدى جوسپارلاعان بولاتىن. جانە ونى تىكەلەي مالشىلار شوعىرلانعان تاۋ تورىندە وتكىزۋ ۇيعارىلعان. وسىعان وراي، جاپ- جاسىل كوگال ۇستىنە اۋدانداعى 14 اۋىلدىق وكرۋگ اقشاڭقان كيىز ۇيلەر تىكتى. ءدال ورتاسىنا قىزىلدى- جاسىلدى ەتىپ اسەم بەزەندىرىلگەن ساحنا ورنالاستىرىلىپ، كۇن سايىن ءتورت تۇلىكتىڭ ءۇنىن جاڭعىرتاتىن تاۋلى ءوڭىر اسپانىن اسەم ءان مەن ءتاتتى كۇي كەرنەدى.
جينالىستى اۋدان اكىمى تەمىرلان بەكتاسوۆ اشتى. «مۇنداي شارا وتكىزۋ بۇرىن دا داستۇردە بولعان ەكەن. ءبىراق، ءارالۋان سەبەپتەرمەن ون جىلدان بەرى توقتاپ قالعان. ءبىز مال شارۋاشىلىعى ەڭبەككەرلەرىنىڭ تاۋقىمەتكە تولى ەڭبەگىن ءارقاشان جوعارى باعالايمىز. سوندىقتان ولاردىڭ ەڭبەگىن ەسكەرىپ، ادەيى جايلاۋدا وسىنداي مەرەكە ۇيىمداستىرىپ بەرۋدى ءجون كوردىك»، - دەي كەلە، وزات مالشىلارعا الماتى وبلىسىنىڭ اكىمى اماندىق باتالوۆتىڭ، وبلىستىق اۋىل شارۋاشىلىعى دەپارتامەنتىنىڭ جانە اۋدان اكىمىنىڭ گراموتالارى مەن العىس حاتتارىن، تاعى دا باسقا سىي- سياپاتتارىن تاپسىردى.
مەرەكە سوڭىندا اۋدان ونەرپازدارى ۇلكەن كونتسەرت كورسەتتى. قىز قۋۋ، اۋدارىسپاق سىندى ۇلتتىق سپورت ويىندارىنان جارىس ءوتتى.
اۆتور: ءنۇرادىل بەگىمبەت