ءىرى كاسىپورىندار كوپبالالى قىزمەتكەرلەرىن باسپانامەن قامتيدى - ەرجان جىلقىبايەۆ
ەلوردادا ءوتىپ جاتقان وتباسىلار فورۋمىندا ءسوز العان ق ر ەڭبەك جانە حالىقتى الەۋمەتتىك قورعاۋ ءمينيسترىنىڭ ورىنباسارى ەرجان جىلقىبايەۆ وسىنداي مالىمەت ايتتى.
«مەملەكەت تاراپىنان الەۋمەتتىك كومەكتىڭ 39 ءتۇرى كورسەتىلەدى. سول ءۇشىن جىل سايىن 3,3 تريلليون تەڭگە، ياعني بيۋجەتتىڭ شىعىس بولىگىنىڭ 27 پايىزى بولىنەدى. انا مەن بالانى قولداۋدىڭ الەۋمەتتىك باعىتى بىرنەشە دەڭگەيدە جۇزەگە اسىپ جاتىر. كوپبالالى انالارعا اقشالاي كومەكتەن بولەك جەڭىلدىكتەردىڭ ءتۇر-ءتۇرى قاراستىرىلعان. زەينەتاقىعا ەرتەرەك شىعۋ، سالىق جەڭىلدىكتەرى، تۇرعىن ءۇي كەزەگىندە باسىمدىق بەرۋ ماسەلەلەرى قاراستىلىپ كەلەدى»، - دەدى مينيسترلىك وكىلى.
ونىڭ ايتۋىنشا، اتالمىش سانات ءۇشىن 2025-جىلعا دەيىن 40 مىڭ جالدامالى پاتەر سالىنباق. 56 مىڭ كوپبالالى وتباسىنىڭ ەكى پايىزدىق يپوتەكا بويىنشا باسپانا الۋعا مۇمكىندىگى بار.
«مينيسترلىك جانىنان قۇرىلعان جۇمىس توبىمەن بىرگە «باقىتتى بالا»، «باقىتتى انا»، «باقىتتى وتباسى»، «باقىتتى ەل» باعدارلامالار كەشەنى ازىرلەنىپ، ەنگىزىلدى. ەلدەگى ءىرى كاسىپورىندارمەن، بيزنەس قاۋىمداستىقتارمەن مەموراندۋمعا وتىردىق. سونىڭ اياسىندا اتالمىش ۇيىمدار كوپبالالى قىزمەتكەرلەرىن باسپانامەن قامتۋعا اتسالىساتىن بولادى. قازىردىڭ وزىندە بۇل ماقساتقا 38 ميلليارد تەڭگەدەن استام قاراجات ءبولىنىپ وتىر»، - دەدى ۆيتسە-مينيستر.