نۇر-سۇلتانداعى قۇرىلىس نىسانىندا پاركينگتەگى ورىندار پاتەر رەتىندە ساتىلعان

نۇر-سۇلتان. قازاقپارات - ەلوردا اكىمى التاي كولگىنوۆ تاڭەرتەڭگىلىك ارالاۋ كەزىندە پروبلەمالى نىساننىڭ ءبىرى «قورعالجىن كۆارتالىندا» بولدى، دەپ حابارلايدى نۇر-سۇلتان اكىمدىگىنىڭ باسپا ءسوز قىزمەتىنە سىلتەمە جاساپ.

بۇل ءۇيدىڭ قۇرىلىسىنا 292 ۇلەسكەر قاراجات سالعان. مۇنداعى پاتەر سانى تۇرعىن ءۇي كەشەنى جوباسىنان ارتىق. بۇرىنعى قۇرىلىس سالۋشى تۇرعىن ءۇيدىڭ جوعارعى تەحنيكالىق قاباتتارى مەن جەرتولەلەرىن پاتەر رەتىندە ساتىپ جىبەرگەن.

«بۇل اۋماقتا ەشقانداي قۇرىلىس جۇمىستارى ءجۇرىپ جاتقان جوق. بىزدە ەڭ تومەنگى قاباتتا پاركينگ بار. ءبىراق بۇل ورىنداردى پاتەر رەتىندە ساتىپ جىبەرگەن. ول جەردەن 13 ادام پاتەر ساتىپ العان. اباتتاندىرۋ جۇمىستارى جوق، ينجەنەرلىك جەلىلەر دە جوق. قازاندىق جابىق تۇر. ءبىز ءتىپتى ونىڭ جۇمىس ىستەيتىن، نە ىستەمەيتىنىن دە بىلمەيمىز»، - دەدى تۇرعىن ءۇيدىڭ ۇلەسكەرلەرى.

ولاردىڭ ايتۋىنشا، ۇلەسكەرلەر وزدەرى كۇزەت جالداپ، قاراۋىل قويعان. سەبەبى، ءۇيدىڭ قۇرىلىس ماتەريالدارىنىڭ قولدى بولىپ كەتۋىنەن قاۋىپتەنەدى. وسىلايشا بۇل تۇرعىن ءۇي كەشەنى 2017-جىلى پروبلەمالى نىسان بولىپ تانىلىپ، سالىنعان قارجى قايتارىمىن قامتاماسىز ەتۋ ءۇشىن قوسىمشا جەر ۋچاسكەسىن ءبولۋ قاراستىرىلعان.

«ۇلەسكەرلەرگە ۇيلەرىنىڭ قۇرىلىسىنىڭ اياقتالىپ، ءوز پاتەرلەرىنە كىرۋى ءۇشىن مەملەكەت كومەكتەسىپ جاتىر. جوبا-سمەتالىق قۇجاتقا تۇزەتۋ ەنگىزەمىز، مەملەكەتتىك ساراپتاما جاسايمىز. وعان قوسا ينجەنەرلىك جەلىلەرى بويىنشا جوبانى الۋ كەرەك. سودان كەيىن بارىپ اباتتاندىرۋ جۇمىستارىنا كىرىسكەن ءجون. جۇمىس جۇرگىزىلەتىن بولادى»، - دەپ اتاپ كورسەتتى قالا اكىمى التاي كولگىنوۆ.

قالادا قۇرىلىسى اياقتالماعان 51 وبەكتى بار.