پرەزيدەنت جەەنبەكوۆ اتامبايەۆ ءىسى تۋرالى العاش رەت پىكىر ءبىلدىردى

نۇر-سۇلتان. قازاقپارات – قىرعىزستان پرەزيدەنتى سوورونباي جەەنبەكوۆ بۇرىنعى پرەزيدەنت المازبەك اتامبايەۆ ءىسى تۋرالى پىكىر ءبىلدىردى.

شۋ وبلىسىندا 31- شىلدەدە وتكەن تۇرعىندارمەن كەزدەسۋ كەزىندە جۋرناليستەر سۇراعىنا جاۋاپ بەرگەن پرەزيدەنت «اتامبايەۆتىڭ ءىسى زاڭ اياسىندا شەشىلۋى كەرەك. بارلىق ادام زاڭعا باعىنۋى ءتيىس» دەدى.

«قىرعىزستاندىقتاردىڭ اتامبايەۆ ىسىنە قاتىستى مەنى نە دەر ەكەن دەپ وتىرعانىن بىلەمىن. اتامبايەۆقا قاتىستى بولىپ جاتقان وقيعا، ونىڭ تەرگەۋگە شاقىرىلۋى - زاڭدى قۇبىلىس. قۇقىقتىق مەملەكەتتە زاڭ اياسىندا عانا ارەكەت ەتۋ كەرەك. ادام كىم بولسا دا، بۇرىنعى پرەزيدەنت پە، شەنەۋنىك پە، اسكەري نە قاراپايىم قىزمەتكەر مە - زاڭ الدىندا ءبارىمىز تەڭبىز، ءبارىمىز زاڭعا باعىنۋىمىز كەرەك. سوندا عانا ەل داميدى. اتامبايەۆتىڭ ءىسى دە قىرعىزستان زاڭناماسىنىڭ اياسىندا شەشىلۋى كەرەك» دەدى جەەنبەكوۆ.

بۇل - جەەنبەكوۆتىڭ اتامبايەۆ ىسىنە قاتىستى العاش رەت پىكىر ءبىلدىرۋى.

قىرعىزستان ىشكى ىستەر مينيسترلىگى بۇرىنعى پرەزيدەنتتى ءۇش رەت تەرگەۋگە شاقىرعانىمەن، اتامبايەۆ ەشبىرىنە بارماعان. ونىڭ زاڭدى وكىلى سەرگەي سلەساريەۆتىڭ سوزىنشە، 2003-جىلعى پرەزيدەنت قىزمەتى تۋرالى زاڭعا سايكەس، اتامبايەۆتىڭ تيىسپەۋشىلىك مارتەبەسى بار. «سوندىقتان پوليتسيانىڭ تەرگەۋگە كەل دەپ جىبەرگەن شاقىرتۋلارىنىڭ زاڭدى كۇشى جوق» دەيدى اتامبايەۆتىڭ ادۆوكاتى.

27- ماۋسىمدا قىرعىزستان پارلامەنتى المازبەك اتامبايەۆتى ەكس-پرەزيدەنت جانە تيىسپەۋشىلىك مارتەبەسىنەن ايىرعان. قىرعىزستاننىڭ بۇرىنعى پرەزيدەنتىنە قىزمەتتە ءجۇرىپ جەمقورلىققا جول بەردى، وكىلەتىن اسىرا پايدالاندى جانە زاڭسىز بايىدى دەگەن سياقتى جالپى سانى بەس ايىپ تاعىلعان. اتامبايەۆ بۇل ايىپتاردىڭ ءبارىن جوققا شىعارىپ، ۇستىنەن قوزعالعان ءىستىڭ ساياسي استارى بار دەپ مالىمدەگەن.