قازاقستاندا جەكە تۇلعالاردان الىناتىن مۇلىك پەن جەر سالىعىن بىرىكتىرۋ ۇسىنىلدى
«قازاقستاندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سالىق سالۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ۇلتتىق ەكونوميكا مينيسترلىگى ازىرلەگەن زاڭ جوباسى شەڭبەرىندە كوپپاتەرلى ۇيلەردىڭ مەنشىك يەلەرى ءۇشىن جەر سالىعىن جويۋ جانە جەكە تۇلعالاردان الىناتىن مۇلىك جانە جەر سالىعىن ءبىر سالىققا بىرىكتىرۋ ۇسىنىلۋدا»، - دەلىنگەن باسپا ءسوز قىزمەتى تاراتقان اقپاراتتا.
سونداي-اق وندا جاڭالىقتىڭ نەگىزگى ماقساتى - جەكە تۇلعالاردىڭ مۇلىك پەن جەر سالىعىن تولەۋىن جەڭىلدەتۋ ەكەنى ايتىلعان.
زاڭ شىعارۋشىلار جەكە تۇلعالاردىڭ مۇلىك جانە جەر سالىعىن سالىق سالۋ نىسانى، سالىق بازاسى، مولشەرلەمە، ەسەپتەۋ جانە تولەۋ سەكىلدى سالىق ەلەمەنتتەرىن وزگەرتپەي، بىرىكتىرۋدى ۇسىنىپ وتىر.
ەكى سالىق ءبىر تولەممەن الىنادى. مولشەرلەمە بۇرىنعىداي، ەشتەڭە قىمباتتامايدى، تەك سالىق تولەۋ ءتاسىلى قولايلىراق بولماق. وسى كۇنگە دەيىن ەكى ءتۇرلى سالىق، ءتۇرلى ەسەپتەۋ ادىستەمەسى، ەكى تۇبىرتەك سالىق تولەۋشىگە قولايسىزدىق تۋدىرىپ كەلدى.
ال كوپپاتەرلى تۇرعىن ءۇيدىڭ مەنشىك يەلەرىنە سالىناتىن جەر سالىعىن مۇلدە جويۋ كوزدەلۋدە. ويتكەنى بولماشى سالىق ءۇشىن نىساننىڭ كوپتىگى مەن ەسەپتەۋدىڭ قيىندىعى سەبەپتى اكىمشىلەندىرۋگە كوپ شىعىن كەتەدى.
قازىرگى ۋاقىتتا قۇجات مەملەكەتتىك ورگانداردا كەلىسۋ راسىمىنەن وتكىزىلۋدە. اعىمداعى جىلعى كۇزدە ونى پارلامەنتكە ەنگىزۋ جوسپارلانىپ وتىر.
قۇجاتتىڭ ءماتىنى مينيسترلىكتىڭ رەسمي سايتىندا جانە نورماتيۆتىك قۇقىقتىق اكتىلەردىڭ اشىق پورتالىندا ورنالاستىرىلعان.
نورمالاردى ەنگىزۋدىڭ جوسپارلانعان مەرزىمى - 2020-جىل.