گولوۆكين قىركۇيەكتە وتەتىن بوكس كەشىنە قارسىلاسسىز قالدى
باسىندا 14- قىركۇيەكتە ساۋل «كانەلو» الۆارەسپەن (52-1-2، 35 ك و) ءۇشىنشى كەزدەسۋ وتكىزبەكشى بولعان، الايدا مەكسيكالىق بوكسشى بۇل ۇسىنىستى قابىلداماي، كەزدەسۋدى جىل سوڭىنا شەگەرۋدى ۇسىندى.
وسىدان كەيىن، گولوۆكين تاعى ءبىر مەكسيكالىق بوكسشى - ءبىرىنشى ورتا سالماقتا WBO تۇجىرىمى بويىنشا الەم چەمپيونى حايمە مۋنگيامەن (33-0، 26 ك و) كەلىسسوزدەر جۇرگىزىپ جاتقانى ايتىلدى.
مەكسيكالىق بوكسشى جاڭا سالماققا وتۋگە دايىن ەكەنىن جەتكىزگەن. سونىمەن قاتار، الۆارەستىڭ پروموۋتەرلەرى (Golden Boy Promotions) گولوۆكينگە 14- قىركۇيەكتى بەرگىسى جوق، ويتكەنى ول كۇنى مەكسيكانىڭ تاۋەلسىزدىك كۇنى اتالىپ وتىلەدى.
GBP وسى كۇنى بوكس كەشىن ۇيىمداستىرىپ، بوكس كەشىنىڭ باستى كەزدەسۋىندە مۋنگيانى امەريكالىق دجەسسي ۆارگاسقا (29-2-2، 11 KO) قارسى قويماق.
ۆارگاس بولسا مۋنگيامەن كەلىسسوزدەر ءجۇرىپ جاتقانىن راستادى. الايدا بۇگە-شىگەسىنە دەيىن ايتۋدان باس تارتتى.
گولوۆكين مەن الۆارەس اراسىندا ءۇشىنشى كەزدەسۋ وتكىزۋ تۋرالى كەلىسسوزدەر تىعىرىققا تىرەلگەن. قازاقستاندىق بوكسشى كەزدەسۋدى لاس-ۆەگاستا وتكىزۋدەن باس تارتقان. الۆارەس ءۇشىنشى كەزدەسۋگە قاتتى قىزىعىپ وتىرماعانى دا ايتىلادى. ول قازاقستاندىق بوكسشىنىڭ سونىڭ ارقاسىندا اقشا تاپقانىن قالامايتىنىن ايتقان.