الەمدىك سىندا رەسەي مەن كۋبا بوكسشىلارى باستى قارسىلاس بولادى - قازاقستاندىق سپورتشى

نۇر-سۇلتان. قازاقپارات - نۇر-سۇلتاندا وتكەن بوكستان پرەزيدەنت كۋبوگى باسەكەسىندە ابىلايحان ءجۇسىپوۆ ءوز مىقتىلىعىن تاعى ءبىر دالەلدەدى.

69 كەلىدە جۇدىرىقتاسقان ول تۋرنير جەڭىمپازى اتانىپ، باس باپكەر عالىمبەك كەنجەبايەۆتان وڭ باعا الدى.

ۇلتتىق وليمپيادا كوميتەتى سايتىنا سۇحبات بەرگەن سپورتشى ءوز دەڭگەيىنە ءالى دە كوڭىلى تولمايتىنىن ايتىپ، تىنىمسىز دايىندىق كۇتىپ تۇرعانىن جەتكىزدى.

«پرەزيدەنت كۋبوگى جوعارى دەڭگەيدە ۇيىمداستىرىلدى. باپكەرلەر تاراپىنان جاقسى باعا العانىم راس. ءبىراق وزىمە كوڭىلىم تولدى دەپ ايتا المايمىن. ءالى دە ەڭبەكتەنىپ، تەر توگۋ كەرەك. تۋرنيردەگى قارسىلاستاردىڭ بارلىعى دا مىقتى بوكسشىلار. سوندىقتان، ەشقايسىسىن ءبولىپ-جارمايمىن. فينالدا كەزدەسكەن تالعات شايكەن جاقسى بوكسشى. ونىڭ بولاشاعى الدا دەپ ويلايمىن»، - دەيدى ول.

ابىلايحان بوكستاعى بۇگىنگى وزگەرىستەرگە توقتالىپ، الەم چەمپيوناتى قارساڭىنداعى دايىندىق كەزەڭدەرى تۋرالى دا ءسوز قوزعادى.

«اۋەسقوي بوكستا ۇلكەن وزگەرىستەر بولعانىن بىلەسىزدەر. بۇرىنعىداي 10 سالماق دارەجەسى ەندى جوق. ەرلەر سەگىز سالماقتا جۇدىرىقتاسادى. بۇل وزگەرىس ءبىرىنشى كەزەكتە سالماعى وليمپيادا باعدارلاماسىنان الىنىپ قالعان جىگىتتەرگە ازداپ قيىندىق تۋدىردى. وليمپ ويىندارىنا ءبىر جىل قالعاندا مۇنداي وزگەرىستەردىڭ بولۋى كىمگە دە بولسا وڭاي ەمەس»، - دەيدى ابىلايحان.

بۇگىندە بوكستان قازاقستان كومانداسى الماتىدا وقۋ-جاتتىعۋ جيىنىن باستادى.

«جاتتىعۋ ويداعىداي ءوتىپ جاتىر. 18 كۇن بويى تاۋدا جاتتىعامىز. الەم چەمپيوناتى دا تاياپ قالدى. سول سەبەپتى، دايىندىقتى ودان ءارى ۇدەتۋ كەرەك. باپكەرلەردىڭ نۇسقاۋىن ورىنداپ، ايتقانىن تىڭداساق جامان بولمايمىز. الەم چەمپيوناتىنداعى قارسىلاستارىم تۋرالى ناقتى ەشتەڭە ايتا المايمىن. سەبەبى، قۇراما ساپىنداعى بوكسشىلار ءبىر سالماقتان ەكىنشىسىنە اۋىسىپ جاتىر. كىمنىڭ قاي سالماققا وتەتىنى ازىرگە بەلگىسىز. دەگەنمەن، كۋبا، رەسەي، انگليا بوكسشىلارىنىڭ قارقىنى جاقسى. ءبىز دە قاراپ قالمايمىز. ماقساتىم ايقىن، ارمانىم شەكسىز»، - دەپ اياقتادى بوكسشى اڭگىمەسىن.