قىرعىز ارنايى قىزمەتى باكيەۆ جايلى فيلمنەن سوڭ ب ا ق- قا ەسكەرتۋ جاسادى
كوميتەتتىڭ باسپا ءسوز قىزمەتى تاراتقان حابارلامادا مۇنداي ءىس-ارەكەتتەرگە جول بەرۋگە بولمايتىنى تۋرالى ەسكەرتۋ ايتىلعان.
«بۇل جاريالانىم مەن تەلەۆيزيالىق ماتەريالدار اۆتورلارى ءوز ءىسى مەن ونىڭ سالدارىن تولىق ءتۇسىنىپ تۇرعان جوق. وسىعان بايلانىستى كوميتەتتىڭ اۆتورعا قوعامدا شيەلەنىس تۋدىرۋى ىقتيمال ارەكەتتەرگە جول بەرۋگە بولمايتىنى تۋرالى ەسكەرتۋ جاساۋعا قۇقىعى بار» دەلىنگەن حابارلامادا.
م ۇ ق ك بۇعان دەيىن قۇرمانبەك باكيەۆ پەن ونىڭ تۋىستارىنا اۋىر جانە اسا اۋىر قىلمىستار جاساعان دەگەن ايىپتار تاعىلىپ، سوت ۇكىمى شىققانىن ەسكە سالعان. قازىر ايىپتالۋشىلاردىڭ بارلىعىنا ىزدەۋ جاريالانعان. ولاردىڭ اراسىندا 2010-جىلى 7- ساۋىردە بولعان وقيعالارعا، كىسى ءولتىرۋ، جەمقورلىق جانە رەيدەرلىككە بايلانىستى تاعىلعان ايىپتار بار. سوت ايىپتى دەپ تانىعانداردىڭ بارلىعىنا ىزدەۋ جاريالانعان.
30- شىلدەدە قىرعىزستانداعى NewTV جانە NurTV تەلەارنالارى ەلدىڭ بۇرىنعى پرەزيدەنتى قۇرمانبەك باكيەۆتىڭ قىزمەتى تۋرالى دەرەكتى فيلم كورسەتكەن. الەۋمەتتىك جەلى قولدانۋشىلاردىڭ ءبىر بولىگى ونى «باكيەۆتى اقتاۋعا تىرىسۋ» دەپ باعالاعان. بۇعان دەيىن ازاتتىقتىڭ قىرعىز قىزمەتىنە بۇرىنعى پرەزيدەنتتىڭ تۋىستارى 1- تامىزدا 70 جاسقا تولاتىن قۇرمانبەك باكيەۆتىڭ مەرەيتويى قۇرمەتىنە دەرەكتى فيلم ازىرلەنىپ جاتقانى جايلى ايتقان ەدى.
قىرعىزستاندا 2010-جىلى 7- ساۋىردە جاپپاي نارازىلىق كەزىندە تۇرعىندار پرەزيدەنت قۇرمانبەك باكيەۆتى ەلدە وتباسىلىق-كلاندىق باسقارۋ ورناتتى دەپ ايىپتاپ، قىزمەتىنەن تايدىرعان. حالىق تولقۋىنان سەسكەنگەن باكيەۆ سول كەزدەگى قازاقستان پرەزيدەنتى نۇرسۇلتان نازاربايەۆ جىبەرگەن ۇشاقپەن قازاقستانعا كەلىپ، ءارى قاراي بەلوررۋسسياعا كەتكەن.
قىرعىزستان سوتى قۇرمانبەك باكيەۆتى 2010-جىلعى ءساۋىر وقيعاسى كەزىندە قۇربان بولعانداردىڭ قازاسىنا ايىپتى دەپ تانىپ، ونى 30 جىلعا باس بوستاندىعىنان ايىرۋ تۋرالى سىرتتاي ۇكىم شىعارعان. ءساۋىر وقيعاسى كەزىندە كەمىندە 87 ادام قازا تاۋىپ، ونداعان ازامات جارالانعان.
باكيەۆ قازىر بەلارۋسسيادا تۇرىپ جاتىر. ول وزىنە تاعىلعان ايىپتى مويىندامايدى.