ەلوردا اكىمىنە پروبلەمالى ۇيلەردىڭ قۇرىلىس قارقىنى ۇنامادى

نۇر-سۇلتان. قازاقپارات - ەلوردا اكىمى التاي كولگىنوۆ كەزەكتى رەت پروبلەمالى تۇرعىن ءۇي نىساندارىن ارالادى، دەپ حابارلايدى قازاقپارات اكىمدىككە سىلتەمە جاساپ.

نۇر-سۇلتان اكىمى 30- شىلدە كۇنى كەشكە الدىمەن «جەتى جول» تۇرعىن ءۇي كەشەنىنىڭ (كوكتال كەنتى) قۇرىلىس الاڭىنا ات باسىن تىرەگەن. اتالعان ءۇيدىڭ قۇرىلىسى 2013-جىلى باستالعان، 2015-جىلى نىسان پروبلەمالى دەپ تانىلعان. ۇلەسكەرلەردىڭ سانى - 600 ادامعا جۋىق.

قۇرىلىس قارقىنىنىڭ باياۋلىعىن بايقاعان التاي كولگىنوۆ: «ءۇش اپتا بۇرىن كەزدەستىك. قۇرىلىس باياۋ ءجۇرىپ جاتىر. ماعان جۇمىس قارقىنى ۇنامايدى. باستاعاننان كەيىن اياقتاۋ كەرەك. ەگەر ءسىز دە وسىنداي ۇستانىمدى ۇستانساڭىز، ءسىزدىڭ الدىڭعى قۇرىلىس سالۋشىدان ەش ايىرماشىلىعىڭىز بولمايدى عوي. ءبىز سىزگە جوبالاۋ جۇمىستارى بويىنشا كومەكتەسىپ، بارلىق ماسەلەلەردى زەردەلەپ وتىرمىز. تەزدەتۋ كەرەك، قۇرىلىس ماۋسىمى اياقتالىپ قالدى»، - دەپ كەيىستىك تانىتتى.

ەكىنشى وبەكت - «كومفورت» تۇرعىن ءۇي كەشەنى بولدى. بۇل نىسان 2015-جىلى پروبلەمالى بولىپ تانىلعان. ۇلەسكەرلەردىڭ سانى - 227 ادام. قۇرىلىس سالۋشى اتالعان نىساندا جۇمىس جۇرگىزىلىپ جاتقانىن، جۇمىسشىلاردىڭ ەكىنشى اۋىسىمى تۋرالى ماسەلە قارالۋ ۇستىندە ەكەنىن اتاپ ءوتتى. قازىرگى كەزدە ولار ينجەنەرلىك جەلىلەر جوباسىن كۇتۋدە.

«بۇل قارقىندى توقتاتپاڭىز. قىسقا مەرزىمدە ناتيجە كورسەتتىڭىز، جۇمىس جۇرگىزىلگەنى بايقالادى. ينجەنەرلىك جەلىلەردىڭ جوباسىن العاننان كەيىن اباتتاندىرۋ ماسەلەلەرى بويىنشا جۇمىستى باستاۋ كەرەك»، - دەپ اتاپ ءوتتى ا. كولگىنوۆ.