ەجەلگى ەگيپەتتىڭ سۋ استىنا كەتكەن قالاسىنىڭ حرامى تابىلدى
مىسىردىڭ ەجەلگى ەسكەرتكىشتەر مينيسترلىگىنىڭ مالىمدەۋىنشە، تابىلعان ارتەفاكتىلەردىڭ اراسىندا حرامنىڭ قالدىقتارى، التىن اشەكەيلەر، مونەتالار، سالتاناتتى قايىقتىڭ بولىكتەرى بار.
گەراكلدىڭ ەسىمىمەن اتالعان قالا كەزىندە حالىق قۇجىناعان مەگاپوليستەردىڭ ءبىرى بولعان. ول ءبىزدىڭ زامانىمىزعا دەيىنگى VIII عاسىردا ءنىل وزەنىنىڭ جەرورتا تەڭىزىنە قۇيار ساعاسىنا سالىنعان. كلەوپاترا پەرعاۋىننىڭ ءوزى وسى قالاداعى حرامداردىڭ بىرىندە تاققا وتىرعان. كەيىن، شامامەن وسىدان 1500 جىل بۇرىن ونى سۋ باستى. قازىر ول 45 مەتر تەرەڭدىكتە قالىپ قويعان.
عالىمدار 2000 -جىلى قالانى تاپقاننان كەيىن، تاريحتىڭ بۇرىن بەلگىسىز قىرلارى اشىلا باستادى. سوڭعى زەرتتەۋلەر كەزىندە ارحەولوگتار ءزاۋلىم حرامنىڭ قالدىقتارىن تاپقان.
بۇدان بولەك، 75 قايىق تابىلعان. سونىڭ ىشىندە سالتاناتتى شارالار كەزىندە قولدانىلعان №61 قايىقتىڭ جەتىسپەي تۇرعان بولىگى دە بار.
ارحەولوگتار قايىقتى قۇراستىرعان سوڭ، ونىڭ ۇزىندىعى 13 مەتر، ەنى 5 مەتر ەكەندىگى بەلگىلى بولدى. قولا جانە التىن مونەتالار، اشەكەي بۇيىمدارى دا تابىلعان. ايتپاقشى، گەراكليوننان تابىلعان قولا مونەتالار 2 - پتولەمەي بيلىك قۇرعان تۇستا، ءبىزدىڭ زامانىمىزعا دەيىنگى 283-246 -جىلدارى سوعىلعان.