ادامزات جەردىڭ جاڭارتىلاتىن رەسۋرستارىنىڭ جىل سايىنعى نورماسىن تاۋىستى
ولار ءبىر جىل ىشىندە قايتا قالپىنا كەلگەنمەن، وسى كۇننەن باستاپ «ەكولوگيالىق نەسيەگە» ءومىر سۇرەتىن بولادى. مۇنداي ماعلۇماتتى «ەكولوگيالىق ءىزدىڭ جاھاندىق جەلىسى» ۇيىمىنىڭ حالىقارالىق تاۋەلسىز اناليتيكالىق ورتالىعى ۇسىندى، دەپ حابارلايدى قازاقپارات.
وزىندىك «ەكوقارىزدىڭ» كۇندەلىكتى ورتاشا كورسەتكىشىن انىقتاۋ ءۇشىن GFN زەرتتەۋشىلەرى بيورەسۋرستاردىڭ تۇتىنۋ مولشەرىن ەكوجۇيەنى قايتا قالپىنا كەلتىرۋ قاسيەتىنە سايكەستەندىرىپ انىقتايدى.
«تابيعي رەسۋرستاردان قاجەتتىلىگىن قامتاماسىز ەتۋ ءۇشىن ادامزاتقا جەر پلانەتاسىنىڭ 1,75 بولىگى قاجەت»، - دەيدى ەكولوگتار.
ءارتۇرلى ەلدەردە جاڭعىرمالى رەسۋرستاردى تۇتىنۋدىڭ ءار ادامعا شاققانداعى مولشەرى ءبىر-بىرىنەن اجەپتاۋىر ەرەكشەلەنەدى. مىسالى، بارلىق حالىقتار رەسۋرستاردى گەرمانيا تۇرعىندارى سياقتى تۇتىناتىن بولسا، ادامزاتقا 3 جەر پلانەتاسى قاجەت بولار ەدى، ال ەگەر ا ق ش سياقتى تۇتىنسا، 5 ەۋى قاجەت. رەسۋرستاردى ۇتىمسىز پايدالانۋ اسىرەسە كاتار ەلىندە بايقالادى. بۇل ەل رەسۋرستاردى «ەكونەسيەگە» 11- اقپاندا-اق پايدالانا باستاعان. ال يندونەزيا رەسۋرستاردى ۇتىمدى تۇتىناتىن ەل بولىپ شىقتى. ول ءۇشىن «ەكونەسيە كۇنى» شامامەن جىلدىڭ سوڭىندا، ياعني 11- جەلتوقساندا باستالادى. الايدا بۇل ەل دە ەكوجۇيە وزدىگىمەن قالپىنا كەلتىرە الاتىن مولشەردەن كوپ تۇتىنادى.
WWF پىكىرىنشە، جەر تابيعاتىنان وتە جىلدام ايىرىلۋدا. مىسالى، 1970-جىلدان باستاپ %60 جابايى اڭدار جويىلعان. ب ۇ ۇ بولجامىنا سايكەس، جانۋارلاردىڭ، وسىمدىكتەر مەن جاندىكتەردىڭ ميلليونعا جۋىق تۇرىنە جويىلۋ قاۋپى ءتونىپ تۇر. مۇنىن بارلىعى - وتە كۇردەلى ماسەلە بولىپ تابىلادى، سەبەبى تابيعات جانە ونداعىنىڭ بارلىعى پلانەتا تۇرعىندارىن ومىرگە اسا قاجەتتى تازا اۋىز سۋمەن، اۋامەن، تاماقپەن، ماتەريالدار مەن ءدارى-دارمەكپەن قامتاماسىز ەتىپ وتىر.