قازاق كۇرەسىنەن ازيا چەمپيوناتى موڭعوليادا وتەدى
بۇل تۋرالى قازاقپارات تىلشىسىنە QAZAQ QURESI» حالىقارالىق فەدەراتسياسىنىڭ پرەزيدەنتى قانات بوزىمبايەۆ ءمالىم ەتتى.
«ءبىز قازاقستاننان تىس جەرلەردە قازاق كۇرەسىن ناسيحاتتاۋدى جالعاستىرامىز. وسى ماقساتتا ازيا جانە الەم چەمپيوناتىن وتكىزۋ جوسپارلانۋدا. ماسەلەن، الداعى تامىزدىڭ 16 سى جانە 17 سى كۇندەرى قازاق كۇرەسىنەن ازيا چەمپيوناتىن موڭعوليادا وتكىزۋ تۋرالى شەشىم قابىلداندى. بۇگىنگى تاڭدا چەمپيوناتقا دايىندىقتىڭ بەلسەندى كەزەڭىنە كوشتىك. قازىردىڭ وزىندە فەدەراتسيالاردان وتىنىمدەردى قابىلداپ جاتىرمىز. ادەتتەگىدەي، سالماعى، سايكەستىگى دەگەن سياقتى پارامەترلەرمەن ىرىكتەۋ جۇرگىزىپ، ۇيىمداستىرۋ ماسەلەلەرىن شەشۋدەمىز»، - دەدى قانات بوزىمبايەۆ.
سونداي-اق، فەدەراتسيا باسشىسى قازاق كۇرەسىنىڭ جازعى وليمپيادا ويىندارىنىڭ باعدارلاماسىنا ەنۋىنە قاتىستى ايتتى.
«ارينە، بۇل ءبىزدىڭ ماقساتىمىز. الايدا وعان جەتۋ ءۇشىن بىرنەشە جىل قاجەت. وسى ۋاقىتقا دەيىن ءبىزدىڭ فەدەراتسيا قۇرامىنا 29 شەت ەل جانە ەكى حالىقارالىق سپورت ۇيىمى كىردى. جاقىن ارادا بىزگە تاعى 10 شەتەلدىك مەملەكەت قوسىلادى دەگەن جوسپار بار. ءبىز وسى ەلدەردىڭ ۇلتتىق چەمپيوناتتارىندا تۇراقتى جۇمىس جاساۋدى ماقسات تۇتتىق. تاعى ءبىر ايتىپ وتەتىن ماسەلە، حالىقارالىق دزيۋدو فەدەراتسياسىنداعى ارىپتەستەرىمىز سپورتشىلارعا قازاق كۇرەسىنەن جارىستارعا قاتىسۋعا تىيىم سالادى. مەنىڭ ويىمشا، قازاق كۇرەسى مەن دزيۋدو ءبىر- ءبىرىن بايىتا الار ەدى. ءبىز ءوز پالۋاندارىمىزعا تىيىم سالمايمىز. كەرىسىنشە، ءبىز ءۇشىن ولاردىڭ وزدەرى قالاعان جەردە كۇرەسىپ، بارىنشا مىقتى تەحنيكانى مەڭگەرگەنى يگى. ءبىزدىڭ قۇرامىمىزدا كەم دەگەندە 40 شەتەلدىك فەدەراتسيا بولعان كەزدە، ەلىمىزدىڭ ۇلتتىق وليمپيادا كوميتەتىنىڭ قولداۋىمەن حالىقارالىق وليمپيادا كوميتەتىمەن كەلىسسوزدەردى باستايمىز دەپ ۇمىتتەمىن»، - دەدى ول.
تامىزدا وتەتىن قازاق كۇرەسىنەن ازيا چەمپيوناتىندا 11 ەلدىڭ قۇراما كومانداسى ءوزارا باق سىنايدى. ولاردىڭ قاتارىندا قازاقستان، قىرعىزستان، تاجىكستان، وزبەكستان، ءۇندىستان، پاكىستان، يران، موڭعوليا، كورەيا، قىتاي جانە جاپونيا ەلى بار. ءدۇبىرلى سايىستا ەلىمىزدىڭ نامىسىن 9 پالۋان قورعايتىنى كۇتىلۋدە.
اۆتور: داۋلەت ىزتىلەۋ