ەلىمىزدە پوليتسيا قاتارىنا قابىلداۋ جەڭىلدەتىلدى

نۇر-سۇلتان.قازاقپارات - قازاقستاندا پوليتسيا قاتارىنا قابىلداۋ جەڭىلدەتىلدى. سالاداعى سوڭعى رەفورمالاردىڭ ناتيجەسىندە قاعازباستىلىق پەن جەمقورلىققا اكەلەتىن تەتىكتەر جويىلىپ، جاس مامانداردى جۇمىسقا الۋدىڭ مەحانيزمى جەتىلگەن.

قازىر ءتارتىپ ساقشىلارىنىڭ ساپى ءبىلىمدى جاس قىز- جىگىتتەرمەن تولىعىپ كەلەدى، دەپ حابارلايدى «حابار 24».

رومان اسقاروۆ. جاسى 31-دە. شەنى - كىشى لەيتەنانت. روماننىڭ پوليتسيا قاتارىنا قوسىلعانىنا جارتى جىلعا جەتەر- جەتپەس قانا ۋاقىت بولدى. سوعان قاراماستان تەرگەۋشى قىزمەتىن اتقارادى. جاس مامانداردى جۇمىسقا تارتۋدىڭ جاڭارتىلعان جۇيەسى وسىلاي بارلىق كەدەرگىنى الىپ تاستاپ، قىز- جىگىتتەردىڭ جاۋاپتى قىزمەتكە بىردەن دەن قويۋىنا نەگىزدەلگەن. سونىڭ ارقاسىندا سالاداعى ەڭبەك ونىمدىلىگى ءوسىپ، جۇمىس ساپاسى ارتا تۇسكەنىن العا تارتادى ماماندار.

ايتپاقشى، قازىر پوليتسيا قىزمەتكەرى اتانۋ ءۇشىن ارنايى اكادەميانى اياقتاۋدىڭ قاجەتى جوق. ماسەلەن، كەيىپكەرىمىزدىڭ ەكونوميكا جانە زاڭ سالالارىندا عانا جوعارى ءبىلىمى بار.

رومان اسقاروۆ، ەسىل اۋداندىق پوليتسيا باسقارماسىنىڭ تەرگەۋشىسى:

- قازىر ءبىلىم بولسا، زاڭدى ءبىلىپ تۇرسا، فيزيكالىق دايىندىعى جاقسى بولسا جۇمىسقا ورنالاسۋعا بولادى. بىزدە، تەرگەۋدە، كوبىنە بىلىمگە كەلىپ تىرەلەدى. ءبىلىمىڭ بولسا، قاتتى قيىنشىلىق بولمايدى.

دياس راقىمجانوۆ، ەسىل اۋداندىق پوليتسيا باسقارماسىنىڭ تەرگەۋشىسى:

- قاتارىمىزعا رومان سياقتى جاس ماماندار كەلگەندە بىلگەن- تۇيگەندەرىمىزدى ۇيرەتىپ، بىرەر اي تاجىريبە الماسامىز. جۇمىس بارىسىندا تۋىنداعان ماسەلەردى شەشۋگە كومەكتەسەمىز. كەيىن ابدەن ۇيرەنىسىپ، قىلمىستىق ىستەردى ءوز بەتىمەن تەرگەي بەرەدى.

ءيا، جۇمىسقا العانعا دەيىنگى قاربالاستىڭ ازايعانىمەن قاتار، جۇمىسقا الىنعاننان كەيىنگى ىنتالاندىرۋ تەتىكتەرى دە كۇشەيتىلگەن. ماسەلەن، جاس مامان تاجىريبەدەن وتكەن باستاپقى ۋاقىتتىڭ وزىندە تولىققاندى ايلىق الادى. بۇعان قوسا، ءبىرىنشى شىلدەدەن باستاپ پوليتسيا قىزمەتكەرلەرىنىڭ جالاقىسى 65 پروتسەنتكە ءوسىپ، پاتەر جالداۋعا بەرىلەتىن كومەكتىڭ كولەمى دە ۇلعايدى. ياعني، قاتارعا جاڭادان قوسىلعان قىز- جىگىتتەردىڭ ەشقانداي ۋايىمسىز قىزمەت ەتۋىنە بارلىق جاعداي جاسالىپ جاتىر.

رۋستام شارىبايەۆ، قالالىق پوليتسيا دەپارتامەنتى باستىعىنىڭ ورىنباسارى:

- بۇرىن پوليتسەي بولۋ ءۇشىن ۇمىتكەرلەر كابينەتتەن- كابينەتكە شاپقىلاپ، ءبىراز قۇجات جيناۋ كەرەك بولاتىن. ءبىز وسىنداي كەدەرگىلەردىڭ بارلىعىن الىپ تاستادىق. قازىر بايقاۋلار بارىنشا اشىق جانە جىلدام وتەدى. پوليتسيا قاتارىنا كوزىندە وتى، بويىندا جىگەرى بار كەز- كەلگەن ادامدى قابىلداۋعا دايىنبىز. ەڭ باستىسى - ول ءوز ءبىلىمى مەن بىلىكتىلىگىن سالانىڭ دامۋىنا جۇمساپ، ەل يگىلىنە قالتىقسىز قىزمەت ەتسە بولعانى.

ەلورداداعى پوليتسيا دەپارتامەنتىنىڭ باسشىلىعى دا جۇمىسقا قابىلداۋ جۇيەسى بارىنشا جەڭىلدەتىلگەنىن العا تارتادى. ءتىپتى، قوسىمشا سۇراقتارعا جاۋاپ بەرۋ ءۇشىن جانە جەمقورلىق فاكتىلەرىن بولدىرماۋ ءۇشىن الەۋمەتتىك جەلىدەگى بەلسەندىلىكتى دە كۇشەيتكەن. ياعني، كەز- كەلگەن ادام دەپارتامەنت باسشىلىعىمەن تىكەلەي بايلانىسقا شىعىپ، جۇمىسقا قاتىستى ءمان- جايدى بىلە الادى. پايدا بولعان كەدەرگىلەردى ايتىپ، ارىز- شاعىمىن جەتكىزۋگە دە مۇمكىندىگى بار.

www.24.kz