ديماش ءوزىنىڭ قازاقشا ءانىن شىرقاعان يندونەزيالىق جانكۇيەرىنىڭ داۋىسىنا تامساندى

«نۇر-سۇلتان. قازاقپارات - ديماش قۇدايبەرگەن ءوزىنىڭ «ۇمىتىلماس كۇن» اتتى ءانىن قازاقشا شىرقاعان يندونەزيالىق فاناتىنىڭ داۋىسىنا تامساندى، دەپ حابارلايدى قازاقپارات.

ديماش Instagram-دا: «يندونەزيالىق وتە تالانتتى جانكۇيەرىمنىڭ ورىنداۋىن قابىل الىڭىزدار. ادەمى، نازىك، تاماشا ورىنداۋ. براۆو!»، - دەپ جازىپ، ۆيدەونى جۇكتەدى.

وندا جاس قىز قازاقستاندىق ءانشى ورىنداپ جاتقان «ۇمىتىلماس كۇن» انىنە قوسىلىپ ايتادى.

ايتا كەتەيىك، بۇل ءاننىڭ اۆتورى - ديماش قۇدايبەرگەن، ءسوزىن ورال بايسەڭگىر جازعان.

ديماش بۇعان دەيىن وزىنە اينىتپاي پاروديا جاساعان تاعى ءبىر قىزدىڭ ونەرىنە ءتانتى بولعان ەدى. ول موڭعوليانىڭ «ياگ تۋۋن شيگ» تەلەشوۋىندا ونەر كورسەتكەن موڭعول قىزى ب. حاليۋن بولاتىن. ول قىتايدا وتكەن «I am a singer» جوباسىندا ديماش شىرقاعان «S. O. S d'un terrien en détressە» اتتى فرانسۋز ءانىن ورىندادى.

بيىلعى ماۋسىم ايىندا جاس دارىن يەسى «ارناۋ» اتتى جەكە كونسەرتىن وتكىزگەن بولاتىن. وعان الەمنىڭ 64 ەلىنەن 10 مىڭعا جۋىق جانكۇيەر كەلدى. كونسەرتتى تاماشالاعان شەتەلدىك فاناتتار قازاقستانعا قايتا ورالۋدى كوزدەپ وتىر.

ديماش الداعى تامىز ايىندا سوچي قالاسىندا رەسەيدىڭ حالىق ءارتىسى، كومپوزيتور يگور كرۋتوي ۇيىمداستىرعالى وتىرعان «نوۆايا ۆولنا» فەستيۆالىندە، كۇزدە نيۋ-يورك، ماسكەۋ، مينسك، ديۋسسەلدورف قالالارىندا وتەتىن ونىڭ مەرەيتويلىق كونسەرتتەرىندە ونەر كورسەتەدى دەپ جوسپارلانۋدا.

بۇدان بولەك، ول رەسەيدىڭ سانكت- پەتەربۋرگ جانە ا ق ش-تىڭ نيۋ-يورك قالالارىندا جەكە كونسەرتىن وتكىزبەك.

اۋدارما: ميرا تولەندى قىزى