رەسەيدەن ورالعان اتامبايەۆ قازاقستانمەن بولعان داۋدى ءسوز ەتتى
«ماسكەۋگە بارعانىم ءۇشىن سىناپ جاتقاندار بار. ول - رەسەي پرەزيدەنتى عانا ەمەس، مەنىڭ دوسىم، جاقىنىم. ماعان ۇشاق جىبەردى. شاقىردى. ۇشىپ كەلۋىمدى ءبىر ەمەس، بىرنەشە رەت سۇرادى. بارمايمىن دەسەم دۇرىس بولماس ەدى. قىرعىزستاندى الاڭداپ وتىر، مالىمدەمەسىن وزدەرىڭىز دە ەستىدىڭىزدەر. «شىنىمەن ءۇشىنشى رەت ريەۆوليۋتسيا بولماق پا؟» دەپ ابىرجىپ وتىر. «ريەۆوليۋتسيانى ءاردايىم بيلىكتىڭ ءوزى جاسايدى. حالىق شاراسىزدىقتان كوتەرىلەدى. [.. .] كىمنىڭ شاقىرعانىن وزدەرىڭىز دە كوردىڭىزدەر. ساپار شىعىنىن دا سولاردان سۇراعان دۇرىس. ءبىزدىڭ قالتامىزدان تيىن دا شىقپادى» دەدى اتامبايەۆ.
بۇرىنعى پرەزيدەنتتىڭ سوزىنشە، قىرعىزستان پرەزيدەنتتىگىنە كانديدات بولعان ومۋربەك بابانوۆتىڭ 2017-جىلى قازاقستانعا ساپارلاپ بارۋى مەن ءوزىنىڭ ماسكەۋدە پۋتينمەن كەزدەسۋىن سالىستىرۋعا بولمايدى.
«بىرىنشىدەن، مەن پرەزيدەنت سايلاۋىنا ءتۇسىپ جاتقان جوقپىن. سايلاۋ ناۋقانى ءجۇرىپ جاتقان جوق. ومۋربەك توكتوگۋلۋلى كورشى ەلگە بارىپ، [نۇرسۇلتان نازاربايەۆتىڭ] رازىلىعىن الىپ كەلدى. سۇراعانى رازىلىق قانا ەمەس شىعار. [قازاقستاننىڭ] جاساعانى دا دۇرىس ەمەس دەپ ويلايمىن. بوتەن ەلدىڭ سايلاۋىنا ارالاسپاۋ كەرەك» دەدى اتامبايەۆ.
ىشكى ىستەر مينيسترلىگىنىڭ تەرگەۋدە تۇسىنىك بەرۋ تۋرالى شاقىرتۋىن بۇعان دەيىن ءۇش رەت ەلەمەگەن اتامبايەۆ «تەرگەۋگە مۇلدە بارمايمىن» دەدى. جۋرناليستەر سۇراعىنا جاۋاپ بەرگەن سوڭ اتامبايەۆتى جاقتاستارى قورشاپ، بۇرىنعى پرەزيدەنت كوي-تاشتاعى اۋىلىنا ءجۇرىپ كەتتى.
اتامبايەۆ ماسكەۋگە 24- شىلدەدە ۇشىپ كەتكەن. ونىڭ سوزىنشە، پۋتين مەن اتامبايەۆ قىرعىزستانداعى ساياسي تۇراقتىلىقتىڭ ماڭىزى جايلى، تىنىشتىق ورناۋى ءۇشىن قوس تاراپتىڭ دا كۇش سالۋ كەرەكتىگى جايلى سويلەسكەن. پۋتيننىڭ ءوزى اتامبايەۆپەن «قىرعىزستان مەن اۋماقتاعى احۋال تۋرالى اڭگىمەلەسكەنىن» ايتقان. ول قىرعىزستاندىقتاردى «قازىرگى پرەزيدەنتتىڭ اينالاسىنا شوعىرلانىپ، وعان مەملەكەتتى دامىتۋ جولىندا كومەكتەسۋگە شاقىرعان».
اتامبايەۆ 2017-جىلى قىرعىزستانداعى پرەزيدەنت سايلاۋى ناۋقانى بارىسىندا قازاقستاننىڭ سول كەزدەگى پرەزيدەنتى نۇرسۇلتان نازاربايەۆتىڭ پرەزيدەنتتىكتەن ۇمىتكەر ساياساتكەرلەردىڭ ءبىرى ومۋربەك بابانوۆتى قابىلداعانىنا نارازى بولعان. ول «نازاربايەۆ قىرعىزستاننىڭ ىشكى ىسىنە ارالاسىپ، وزىنە ىڭعايلى كانديداتقا قولداۋ كورسەتتى» دەپ ايىپتاعان ەدى. ەكى ەل باسشىلارى اراسىنداعى «سالقىن قارىم-قاتىناس» شەكاراداعى جاعدايعا دا اسەر ەتىپ، قازاقستان جاعى شەكاراداعى تەكسەرۋدى كۇشەيتكەن. تەك جاڭادان سايلانعان پرەزيدەنت سوورونباي جەەنبەكوۆ نازاربايەۆپەن كەزدەسكەننەن كەيىن عانا كەدەندەگى جاعداي قالپىنا تۇسكەن.
27- ماۋسىمدا قىرعىزستان پارلامەنتى المازبەك اتامبايەۆتى ەكس-پرەزيدەنت جانە تيىسپەۋشىلىك مارتەبەسىنەن ايىرعان. قىرعىزستاننىڭ بۇرىنعى پرەزيدەنتىنە قىزمەتتە ءجۇرىپ جەمقورلىققا جول بەردى، وكىلەتىن اسىرا پايدالاندى جانە زاڭسىز بايىدى دەگەن سياقتى جالپى سانى بەس ايىپ تاعىلعان. اتامبايەۆ بۇل ايىپتاردىڭ ءبارىن جوققا شىعارىپ، ۇستىنەن قوزعالعان ءىستىڭ ساياسي استارى بار دەپ مالىمدەگەن.
«ازاتتىق»