رەسەيدەن قىرعىزستانعا ورالعان اتامبايەۆ پۋتينمەن نە تۋرالى سويلەسكەنىن ايتتى

نۇر-سۇلتان. قازاقپارات - قىرعىزستاننىڭ بۇرىنعى پرەزيدەنتى المازبەك اتامبايەۆ ارنايى رەسەيگە بارىپ، رەسەيلىك باسشى ۆلاديمير پۋتينمەن كەزدەسىپ قايتتى.

بۇعان دەيىن رەسەي پرەزيدەنتى بۇرىنعى ارىپتەسىمەن جۇزدەسكەنى جونىندە پىكىر بىلدىرگەن بولاتىن دەپ حابارلايدى Sputnik.

اتامبايەۆ قىرعىزستانعا كەشە ساعات 18:40 شاماسىندا ورالدى. ونىڭ ۇشاعى «كانت» و د ك ب اۆيابازاسىنا قونعان.

ودان كەيىن ەكس-پرەزيدەنت ءوز جاقتاستارى مەن ب ا ق وكىلدەرىمەن كەزدەستى.

بۇرىنعى مەملەكەت باسشىسى رەسەي پرەزيدەنتىمەن كەزدەسۋ جاقسى وتكەنىن جەتكىزدى.

پۋتين ءوز كەزەگىندە اتامبايەۆقا قىرعىزستاننىڭ قازىرگى باسشىسى سووروگباي جەەنبەكوۆپەن بىرىگۋگە كەڭەس بەرگەن. الايدا، ەكس-پرەزيدەنت ءوز سۇحباتىندا «بىرىگۋدىڭ ۋاقىتى ءوتىپ كەتكەنىن» ايتقان.

«مەن پۋتينمەن ەكس-پرەزيدەنت اتامبايەۆ رەتىندە سويلەستىم. وعان ءوز كوزقاراسىمدى جەتكىزدىم. ول پرەزيدەنت قانا ەمەس، ول مەنىڭ دوسىم. ول ارنايى ۇشاق جىبەرىپ، مەنى شاقىردى. بارماسقا ۇيات بولدى. ادامي تۇرعىدا ول دۇرىس بولمايتىن ەدى.

ۆلاديمير ۆلاديميروۆيچ قىرعىزستانعا الاڭداۋلى. ول ءۇشىنشى ريەۆوليۋتسيا قاجەت ەمەس ەكەنىن ايتتى. مەن وعان ەكى ريەۆوليۋتسيا كورگەنىمدى ايتتىم. ونى بيلىكتىڭ ءوزى جاسايدى، حالىقتى سوعان يتەرمەلەيدى»، - دەدى ساياساتكەر.

وعان قوسا، اتامبايەۆ كانتتان ماسكەۋگە ۇشىپ بارۋ ءۇشىن جۇمسالعان شىعىندى رەسەيلىك تاراپ تولەگەنىن حابارلادى.