مەسسيدى التى ايعا ۇلتتىق قۇرامادان شەتتەتۋى مۇمكىن
سارسەنبى كۇنى مەسسي ءبىر ماتچقا شەتتەتىلىپ، وعان $1,5 مىڭ كولەمىندە ايىپپۇل سالىندى. سونداي-اق، 32 جاستاعى شابۋىلشىنىڭ 2022-جىلى كاتاردا وتەتىن الەم چەمپيوناتىنىڭ ىرىكتەۋ كەزەڭىندەگى العاشقى كەزدەسۋگە قاتىسپايتىنى ايتىلعان ەدى.
امەريكا كۋبوگى بارىسىندا مەسسي بىرنەشە شۋلى وقيعانىڭ قاتىسۋشىسى بولدى. ولاردىڭ ءمان-جايى انىقتالعان جاعدايدا ويىنداردان شەتتەتىلۋ مەرزىمى ۇزارتىلۋى مۇمكىن. اتالمىش ماسەلەنىڭ شەشىمى كەلەسى اپتادا بەلگىلى بولادى.
مەسسي امەريكا كۋبوگىنىڭ جارتىلاي فينالىندا برازيليا كومانداسىمەن وتكەن ماتچتىڭ ناتيجەسىنە قاتىستى تورەشىلەر تاراپىنا سىن ايتقان. ويىندا ارگەنتينالىقتار الاڭ يەلەرىنەن 0:2 ەسەبىمەن جەڭىلگەن ەدى. سونداي-اق، فۋتبولشى تۋرنيردەگى تورەشىلەر قۇرامىنا نارازىلىق رەتىندە ماراپاتتاۋ راسىمىنە قاتىسۋدان باس تارتىپ، چيلي كومانداسىمەن ءۇشىنشى ورىن ءۇشىن وتكەن كەزدەسۋدەن (2:1) كەيىن وڭتۇستىك امەريكالىق فۋتبول كونفەدەراتسياسىن جەمقورلىققا باتتى دەپ كىنا تاقتى. ماتچ بارىسىندا مەسسي تەرىس قىلىعى ءۇشىن الاڭنان قۋىلدى.
ارگەنتينا قۇراماسىنىڭ قۇرامىندا مەسسي 2008-جىلعى بەيجىڭ وليمپياداسىندا التىن مەدال، 2014-جىلى برازيليادا وتكەن الەم چەمپيوناتىندا كۇمىس جۇلدە جەڭىپ العان ەدى. فۋتبولشى بەس مارتە الەمنىڭ ۇزدىك ويىنشىسى دەپ تانىلعان.