سولتۇستىك كورەيا شىعىس تەڭىزدە ەكى زىمىران ۇشىردى
وڭتۇستىك كورەيا شتاب باسشىلارى بىرلەسكەن كوميتەتىنىڭ (JCS) حابارلاۋىنشا، سولتۇستىك كورەيا مەن ا ق ش كوشباسشىلارى وتكەن ايدا ەكى كورەيا شەكاراسىندا بولعان كەزدەسۋ كەزىندە تاياۋ ۋاقىتتا جۇمىس دەڭگەيىندە كەلىسسوزدەر جۇرگىزۋگە كەلىسكەن. الايدا ونى وتكىزۋ مۇمكىندىگى بەلگىسىز بولعاندىقتان، وسىنداي وقيعا ورىن العان.
«سولتۇستىك كورەيا جاقىن قاشىقتىققا جەرگىلىكتى ۋاقىتپەن تاڭعى ساعات 5:34 تە، تاعى ءبىر زىمىراندى - تاڭعى ساعات 5:57 دە حودو تۇبەگىنەن، ۆونسان قالاسىنا جاقىن ماڭنان شىعىس تەڭىزگە ۇشىردى»، - دەپ حابارلادى كوميتەتتەن.
كوميتەتتەگى وفيتسەرلەردىڭ ءبىرىنىڭ ايتۋىنشا، ءبىر زىمىران 430 شاقىرىم، ەندى ءبىرى ودان الىسىراق قۇلاعان. ا ق ش جۇرگىزگەن تالداۋعا سايكەس، ولاردىڭ ەكەۋى دە 50 شاقىرىم بيىكتە ۇشقان. بولجام بويىنشا، زىمىراندار شىعىس تەڭىزگە قۇلاعان.
«ءبىزدىڭ پايىمداۋىمىزشا، كيم چەن ىن قازىر جازعى اسكەري وقۋ-جاتتىعۋلار جۇرگىزىلىپ جاتقان، زىمىران ۇشىرىلعان ايماقتا ءجۇر. ءبىز جاعدايدى ءجىتى باقىلاپ وتىرمىز»، - دەپ اتاپ ءوتتى كوميتەتتەگى دەرەككوز.
كوميتەت زىمىرانداردىڭ بالليستيكالىق ەكەنىن جانە ك ح د ر- ءدىڭ مامىردا ەكى رەت ۇشىرعان زىمىراندار ۇلگىسىنەن ەكەنىن انىقتاۋ ءۇشىن قوسىمشا تالداۋ جۇرگىزۋ قاجەتتىگىن اتاپ ءوتتى.