ءۋاليحان بيسەنقۇلوۆ نوكاۋتقا ءتۇسىپ، تيتۋلعا قول جەتكىزە المادى

نۇر-سۇلتان. قازاقپارات - ماسكەۋدەگى Korston Club كەشەنىندە كاسىپقوي بوكس كەشى ءوتتى. ونىڭ حەدلاينەرلەرى قازاقستاندىق ءۋاليحان بيسەنقۇلوۆ (9-0، 9 ك و) پەن رەسەيلىك ارتۋش ساركيسيان (5-7، 3 ك و) بولدى، دەپ حابارلايدى قازاقپارات Sports.kz سايتىنا سىلتەمە جاساپ.

بوكسشىلار IBA Asia نۇسقاسى بويىنشا ءبىرىنشى اۋىر سالماقتاعى الەم چەمپيونى اتاعى ءۇشىن تالاستى. جەكپە-جەك 10 راۋندقا ەسەپتەلگەن ەدى. ءبىراق بيسەنقۇلوۆ ءۇشىنشى راۋندتا جاعىنا تيگەن سوققىدان كەيىن نوكاۋتقا ءتۇستى.

وسىلايشا، ساركيسيان IBA Asia تيتۋلىنا يە بولىپ، پروفي-رينگتەگى التىنشى جەڭىسىنە قول جەتكىزدى.

ايتا كەتەيىك، 2018-جىلدىڭ اقپانىندا كاسىپقوي بوكسقا كەلگەن بيسەنقۇلوۆ بۇعان دەيىنگى بارلىق توعىز ايقاسىن نوكاۋتپەن اياقتاپ، جەڭىسكە جەتكەن بولاتىن.