پرەزيدەنتتىڭ كادرلىق رەزەرۆىنە كىمدەر قابىلدانبايدى

نۇر- سۇلتان. قازاقپارات - مەملەكەتتىك قىزمەت ىستەرى اگەنتتىگىنىڭ كەڭەيتىلگەن وتىرىسىندا اگەنتتىك ءتوراعاسى انار جايىلعانوۆا ەلىمىزدە پرەزيدەنتتىك كادرلىق رەزەرۆتى قالىپتاستىرۋ تۋرالى ايتتى.

بۇل جونىندە اگەنتتىكتىڭ باسپا ءسوز قىزمەتىنە سىلتەمە جاساپ قازاقپارات حابارلايدى.

پرەزيدەنت قاسىم- جومارت توقايەۆ ءوزىنىڭ «يگىلىك بارشاعا! ساباقتاستىق. ادىلدىك. ورلەۋ» سايلاۋالدى باعدارلاماسىندا شەشىم قابىلداۋعا جانە ءتۇرلى جاعدايلار مەن ترەندتەرگە تەز بەيىمدەلۋگە قابىلەتتى «جاڭا فورماتسيا» باسشىلارىنىڭ باسقارۋشى قۇرامىن جاڭارتۋ قاجەتتىگىن جاريالادى. 15 - شىلدەدە ۇكىمەتتىڭ كەڭەيتىلگەن وتىرىسىندا مەملەكەت باسشىسى مەملەكەتتىك ورگانداردىڭ تيىمدىلىك كورسەتكىشتەرى كوبىنەسە قوعام پىكىرىمەن ۇيلەسپەي جاتاتىنىن اتاپ ءوتتى.

انار جايىلعانوۆانىڭ ايتۋىنشا، پرەزيدەنتتىك كادرلىق رەزەرۆ كەلەشەگى كەمەل جاستار ءۇشىن الەۋمەتتىك جەدەل ساتى بولىپ، جاڭا فورماتسيا باسشىلارىنىڭ دەرەككوزىنە اينالۋى ءتيىس. سوندىقتان، جوبانىڭ اۋقىمىن ەسكەرە وتىرىپ، ىرىكتەۋدىڭ ءار كەزەڭىندە وبەكتيۆتىلىك، ساپا جانە اشىقتىق ءۇردىسى قامتاماسىز ەتىلۋى قاجەت.

رەزەرۆكە كىرەتىن تۇلعالار ساياسي جانە جوعارى اكىمشىلىك باسقارۋشى، سونداي- اق ۇلتتىق حولدينگتەر مەن كومپانيالاردىڭ باسشىلىق لاۋازىمدارىنا تاعايىندالادى.

ىرىكتەۋ مەحانيزمى كليەنتكە باعدارلانۋ تۇرعىسىنان پىسىقتالعان. ىرىكتەۋگە جوعارى ءبىلىمى بار جاس قازاقستاندىقتار، سونىمەن قاتار، شەتەلدەگى وتانداستار دا قاتىسا الادى. دەگەنمەن، وعان پرەزيدەنت تاعايىندايتىن ساياسي مەملەكەتتىك قىزمەتشىلەر قاتىسا المايدى.

رەزەرۆكە قابىلدانعاننان كەيىن ولاردى پرەزيدەنت جانىنداعى مەملەكەتتىك باسقارۋ اكادەمياسى مەن نازاربايەۆ ۋنيۆەرسيتەتى بازاسىندا وقىتۋ جوسپارلانىپ وتىر.