قورعانىس ءمينيسترى ارىستاعى جارىلىس تابيعي قۇبىلىس دەگەن سوزىنە تۇسىنىكتەمە بەردى

نۇر-سۇلتان. قازاقپارات - ق ر قورعانىس ءمينيسترى نۇرلان ەرمەكبايەۆ ارىستاعى جارىلىس تۋرالى قوعامدىق رەزونانس تۋدىرعان پىكىرگە تۇسىنىكتەمە بەردى، دەپ حابارلايدى قازاقپارات ءتىلشىسى.

«جاعدايدى ءادىل باعالاۋ ءۇشىن جاۋاپكەرشىلىك پەن كىنانى شاتاستىرماعان ءجون. مەن جاۋاپكەرشىلىكتەن قاشپايمىن. ال كىنانى سوت انىقتايدى. بۇعان دەيىن بىرنەشە رەت ءوز اتىمنان، اسكەريلەر اتىنان ارىس تۇرعىندارىنا جاعدايعا بايلانىستى وكىنىش ءبىلدىردىم. قارالى ۇيگە كوڭىل ايتتىم، كەشىرىم سۇرادىم. ءالى دە زارداپ شەككەندەردەن جۇزبە-ءجۇز كەزدەسىپ، كەشىرىم سۇراۋعا دايىنمىن»، - دەدى مينيستر ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ونىڭ ايتۋىنشا، اسكەري ادامنىڭ مىندەتى - ادەمى سوزدەر ايتىپ، پوپۋليزممەن اينالىسۋ ەمەس، ناقتى ىسپەن جاعدايدى تۇزەتۋ.

«بەيتانىس جىگىت كەلىپ، امانداسپاي، ءوزىن تانىستىرماي، ەكونوميكاعا نۇقسان كەلتىردىڭ دەپ ايىپتاسا جانە كامەرا الدىندا كەشىرىم سۇراۋدى تالاپ ەتسە، ءار ادام ءارتۇرلى جاۋاپ قاتار ەدى. مەن دە بەيتانىس ادامعا كەشىرىم سۇراۋدىڭ نەگىزى جوق دەپ جاۋاپ بەردىم. قايتالاپ ايتامىن، مەن كامەرا الدىندا ەمەس، زارداپ شەككەن تۇرعىنداردان كەشىرىم سۇرادىم جانە تاعى سۇراۋعا دايىنمىن»، - دەدى ن. ەرمەكبايەۆ.

سونىمەن بىرگە، مينيستر قوعامدىق رەزونانس تۋدىرعان «تابيعي نارسە» ءسوزى تۋرالى تۇسىنىكتەمە بەردى.

«مەن ورىس مەكتەبىن بىتىرگەنمىن. 1 -سىنىپتان 10 -سىنىپقا دەيىن قازاق تىلىندە بىردە- ءبىر ساباق الماعانمىن. سوندىقتان، قازاق ءتىلىن مۇلتىكسىز بىلەمىن دەپ ايتا المايمىن. ءبىراق، ەلىمىزدە قازاق ءتىلىن جەتىك بىلەتىن ادامدار «تابيعي نارسە» ءسوزىن ورىسشاعا دۇرىس اۋدارمادى. سوزدىكتە «تابيعي» ءسوزى ەڭ الدىمەن «ەستەستۆەننىي» دەپ اۋدارىلادى. ايتقىم كەلگەنى، ءبولىم كومانديرىن كىنالى دەپ ايتۋعا بولمايدى. سەبەبى، ءاربىر اسكەري نىساندا قاۋىپ-قاتەر بولادى. مۇندا سالعىرتتىق نەمەسە نەمقۇرايلىق، ادەيى جاسالعان نەمەسە تەحنيكالىق سەبەپتەر بولۋى مۇمكىن. ونى ارنايى كوميسسيا انىقتايدى»، - دەپ ءوز ءسوزىن تۇيىندەدى قورعانىس ءمينيسترى.

ەسكە سالا كەتسەك، ارىس قالاسىنداعى اسكەري ءبولىمنىڭ قويماسىندا 24 -ماۋسىم كۇنى تاڭەرتەڭ جارىلىس بولدى. سالدارىنان ءۇش ادام قازا تاپتى - ارىس تۇرعىنى مەن ەكى اسكەري قىزمەتشى. 170 كە جۋىق ادام زارداپ شەكتى. 20 عا جۋىق ءۇي، 9 قورا-قوپسى جانىپ، دالالى اۋماقتا 14 وشاق تۇتاندى. ءۇي- جايلار مەن عيماراتتاردىڭ 80-90 پايىزىنا ءارتۇرلى دەڭگەيدە زاقىم كەلدى. ءبىرقاتار وڭىردە شۇعىل جەلىلەر قۇرىلدى.

تۇركىستان وبلىسىنا ارنايى بارعان قازاقستان پرەزيدەنتى قاسىم-جومارت توقايەۆ ارىستاعى اسكەري بولىمشەدەگى وق- ءدارى قويماسىنداعى جارىلىستان زارداپ شەككەن قالا تۇرعىندارىمەن كەزدەسىپ، قالانىڭ قالپىنا كەلتىرىلەتىنىنە ۋادە بەردى. سونداي-اق ەلباسى نۇرسۇلتان نازاربايەۆ ارىستاعى جاعدايعا الاڭداۋشىلىق ءبىلدىردى. تۇڭعىش پرەزيدەنتتىڭ توراعالىعىمەن قاۋىپسىزدىك كەڭەسىنىڭ وتىرىسى ءوتىپ، وندا ارىس قالاسىنداعى احۋال تالقىلاندى.

ۇكىمەت وتىرىسىندا پرەمەر- مينيستر اسقار مامين جارىلىس سالدارىنان كوز جۇمعانداردىڭ تۋعان-تۋىستارىنا كوڭىل ايتىپ، تۇرعىندارعا بارلىق كومەك كورسەتىلەتىنىن ايتتى. كەلتىرىلگەن زالالدىڭ كولەمى باعالانىپ، ۇكىمەت رەزەرۆىنەن اقشا بولىنەدى.

ەۆاكۋاتسيالاۋ كەزىندە مىڭنان استام اتا-انا بالارىنان كوز جازىپ قالدى. سابيلەردىڭ بارلىعى تۋىس-تۋعاندارىنا ءدىن-امان تاپسىرىلدى.

فاكتى بويىنشا قىلمىستىق ءىس قوزعادى.