قازاقستان جەڭىل موتورلى بايكال ۇشاقتارىن قۇراستىرماق
بۇل تۋرالى بۇگىن ۇكىمەت ۇيىندەگى باسپا ءسوز ءماسليحاتىندا ق ر يندۋستريا جانە ينفراقۇرىلىمدىق دامۋ ۆيتسە- ءمينيسترى امانياز ەرجانوۆ ايتتى، دەپ حابارلايدى قازاقپارات ءتىلشىسى.
«رەسەيلىك وندىرۋشىلەرمەن بىرگە L-610 جانە جەڭىل موتورلى بايكال ۇشاقتارىن قۇراستىرۋ جوبامىز بار. بۇل باعىتتا كەلىسسوزدەر ءجۇرىپ جاتىر. مەنىڭشە، «قازاقستان ينجينيرينگ» رەسەيلىك كومپانيالارمەن بىرلەسىپ، بۇل جۇمىستى وسى جىلدىڭ سوڭىندا باستايتىن بولادى»، - دەدى امانياز ەرجانوۆ.
ۆيتسە- ءمينيستردىڭ ايتۋىنشا، وسى جىلدىڭ ءساۋىر ايىندا ق ر يندۋستريا جانە ينفراقۇرىلىمدىق دامۋ مينيسترلىگى مەن ر ف ونەركاسىپ جانە ساۋدا مينيسترلىگى اراسىندا وندىرىستىك كووپەراتسيانى دامىتۋ سالاسىندا بىرلەسكەن ءىس- قيمىل باعدارلاماسى قابىلدانعان. ونىڭ اياسىندا كاماز كولىگىنىڭ كومپونەنتتەرىن، Hyundai ماركالى ماشينالار مەن ولاردىڭ كومپونەنتتەرىن ءوندىرۋ، «ازيا اۆتو قازاقستان» ا ق ارقىلى تولىق سيكلدى اۆتوزاۋىت سالۋ بويىنشا جوبالار كوزدەلگەن.
«ەگەر اۆتوموبيل ونەركاسىبىندەگى جاھاندىق جاعداي تۋرالى ايتاتىن بولساق، الەمدە ءبىز ءبىرقاتار وزگەرىستەردى بايقاپ كەلەمىز. الەمدىك ترەندتەردىڭ ءبىرى قورشاعان ورتانى قورعاۋ ماقساتىندا ەكولوگيالىق تازا ماشينالار ءوندىرىسىن، ءبىرىنشى كەزەكتە ەلەكتروموبيلدەردى دامىتۋ بولىپ سانالادى»، - دەپ اتاپ ءوتتى ۆيتسە- مينيستر.
ونىڭ سوزىنە قاراعاندا، تاياۋ بولاشاقتا بالاما تەحنولوگيالار قولدانىلعان كولىكتەردىڭ الەمدىك ساتىلىمداعى ۇلەسى 89 پايىزعا جەتىپ جىعىلماق.
«قازاقستان الەمدىك ترەندكە ساي بولۋعا ۇمتىلادى. سوندىقتان ءبىز مۇنداي جۇمىستى جۇرگىزىپ جاتىرمىز. ماسەلەن، «سارى ارقا اۆتوونەركاسىبىندە» Jac ۇلگىسىندەگى 30 دان استام ەلەكتروموبيل قۇراستىرىلدى. ەلەكتروموبيلدەردى ەلىمىزدىڭ كليماتتىق جانە ينفراقۇرىلىمدىق جاعدايىندا پايدالانۋ مۇمكىنشىلىكتەرىنە اۋقىمدى زەرتتەۋ جۇرگىزىلدى. ساتىپ الۋشىلار ءۇشىن مۇنداي كولىك تۇرلەرىنىڭ قۇنىن تومەندەتۋ جۇمىستارى جۇرگىزىلىپ جاتىر»، - دەدى امانياز ەرجانوۆ.
اۆتور: مارلان جيەمباي