تاجىك بيلىگى حالىق ساناعى كەزىندە ادامداردىڭ ءدىني سەنىمىن انىقتاماق
تاجىكستان پارلامەنتى تومەنگى پالاتاسىنىڭ الەۋمەتتىك ماسەلەلەر جونىندەگى كوميتەتىنىڭ وكىلى ابدۋحاليم گاففوروۆتىڭ ايتۋىنشا، ەلدە تۇرعىنداردىڭ دەنى يسلام ءدىنىن ۇستانادى، ءبىراق بۇنى حالىق ساناعى كەزىندە ناقتىلاۋ كەرەك.
«ءبىز حالىقتىڭ 90 پايىزدان استامى مۇسىلمان دەيمىز. حالىق ساناعى بارىسىندا قانشا مۇسىلمان، قانشا حريستيان، قانشا اتەيست جانە باسقا دا ءدىن وكىلدەرى بار ەكەنىن انىقتايمىز» دەدى دەپۋتات.
گاففوروۆتىڭ ايتۋىنشا، مۇنداي مالىمەت مەملەكەتتىك ورگاندارعا، سونىمەن بىرگە تاجىكستان بيلىگىمەن ارىپتەس حالىقارالىق ۇيىمدارعا قاجەت. الەمنىڭ كوپتەگەن ەلىندە حالىق ساناعى بارىسىندى ءدىني سەنىمى تۋرالى سۇراق جوق نەمەسە مۇنداي ساۋالعا جاۋاپ بەرۋ مىندەتتى ەمەس.
تاجىكستاندا يسلام دىنىنە جاتپايتىن 70 تەن استام ءدىني ۇيىم تىركەلگەن. تاجىك بيلىگىنىڭ ءدىني ۇيىمدار مەن يسلام ءدىنىنىڭ ءتۇرلى اعىمدارىنا قىسىم جاساپ وتىرعانىن حالىقارالىق ۇيىمدار مەن باتىس ەلدەرى ۇنەمى سىنايدى. اقش ۇكىمەتىنىڭ حالىقارالىق ءدىني بوستاندىق ەسەبىندە «تاجىكستاننىڭ سالافي، يەگوۆا كۋاگەرلەرى، پروتەستانتتاردى قۋدالايتىنى» جازىلعان.