فۋتبولدان چەمپيوندار ليگاسى: «استانا» قارسىلاسىن جەڭدى

نۇر-سۇلتان. قازاقپارات - بۇگىن فۋتبولدان ۋەفا چەمپيوندار ليگاسى ءبىرىنشى كەزەڭى باستالدى.

سپورتتىق دودادا ەلوردالىق «استانا» ءوز الاڭىندا رۋمىنيانىڭ چ ف ر كومانداسىن قابىلدادى، دەپ حابارلايدى قازاقپارات ءتىلشىسى.

ايتا كەتەلىك، «استانا» ايتۋلى الاماندا بيىل بەسىنشى جىل قاتارىنان باق سىناپ وتىر. بۇدان بۇرىنعى جىلداردا ءبىر مارتە ۋەفا چەمپيوندار ليگاسىنىڭ توپتىق كەزەڭىندە س توبىندا سىنعا ءتۇستى. قالعان جىلداردا اتالمىش تۋرنيردىڭ ءۇشىنشى جانە پلەي-وفف كەزەڭدەرىندە ءسۇرىنىپ، ناتيجەسىندە ۋەفا ەۋروپا ليگاسى توپتىق كەزەڭىندە وينادى.

چ ف ر كومانداسى دا وسال قارسىلاس ەمەس. سوڭعى جىلداردا ەۋروكۋبوك ويىندارىندا ءجيى بوي كورسەتىپ كەلەدى. اتالمىش كلۋب كلۋج-ناپوكا قالاسىنىڭ نامىسىن قورعايدى.

1907-جىلى قۇرىلعان كوماندا عاسىرلىق تاريحىندا تولايىم تابىسىمەن ماقتانا المايدى. رۋمىنيانىڭ ءبىرىنشى ليگاسىندا بۇگىنگى كۇنگە دەيىن بار-جوعى 13 مارتە باق سىناعان ولار سوڭعى جىلداردا جۇلدەگەرلەر قاتارىنان تۇراقتى تۇردە كورىنىپ كەلەدى.

بۇگىنگى كەزدەسۋگە قوس كوماندا دا تاس-ءتۇيىن دايىندىقپەن شىققان سەكىلدى. بۇرىن ءبىر- بىرىمەن شەبەرلىك بايقاسىپ كورمەگەن ەكەۋى ۇرىمتال ساتتەردى كۇتىپ ءجۇردى. «استانا» ويىن تىزگىنىن قولعا ۇستاۋعا تىرىستى. شابۋىل شەبىندە كوبىرەك بوي كورسەتتى. دەسە دە العاشقى مينۋتتاردا چ ف ر كومانداسىنىڭ ويىنشىلارى ءبىزدىڭ قاقپا ماڭىن ءجيى تورۋىلدادى.

ءبىرىنشى كەزەڭنىڭ ەكىنشى مينۋتىندا رۋمىندار ءبىزدىڭ قاقپاعا العاشقى سوققىسىن جاسادى. ول قاقپادان بيىك كەتتى.

ال 11-مينۋتتا چ ف ر ساپىنان حۋان كۋليو ايىپ دوبىن ورىنداعان ەدى. ونىڭ تەپكەن دوبى دا دىتتەگەن ماقساتىنا جەتە العان جوق. ويىننىڭ 15-مينۋتىندا «استانا» قاۋىپتى ساتتەر ۇيىمداستىردى. ال 30-مينۋتتاردا ءبىزدىڭ جىگىتتەر قارسىلاستار قاقپاسى ماڭىندا جىلدام قيمىلداپ، رۋمىندىق قورعاۋشىلارعا ءبىراز جۇمىس تاۋىپ بەردى.

ءبىرىنشى كەزەڭ 0:0 ەسەبىمەن اياقتالدى. ەكىنشى كەزەڭدە دە ويىن تارتىستى ءوربىدى. رۋمىن كومانداسىنان كونستانتين پەۋن ايىپ دوبىن ورىنداعان ەدى. ونىڭ تەپكەن دوبى قاقپادان بيىك ۇشتى.

ال 57 مينۋتتا «استانا» ويىنشىسى دورين روتاريۋ رۋمىن قاقپاشىسىنىڭ شەبەرلىگىن تەكسەرىپ كوردى. ويىننىڭ 65-مينۋتىنان باستاپ ءبىزدىڭ جىگىتتەر ءبىرشاما باسىم وينادى. ناتيجەسىندە 68-مينۋتتا قارسىلاستار قاقپاسىنا گول سوعىلدى.

وڭ قاناتتان بەرىلگەن بۇرىشتاما دوبىن «استانا» قورعاۋشىسى ەۆگەني پوستيننيكوۆ قاقپاعا سوعىپ كەتتى. ال 80-مينۋتتا چ ف ر فۋتبولشىسى بيلەل ومراني اشىق تۇرعان قاقپاعا گول سوعا العان جوق.

وسىلايشا «استانا» قارسىلاسىنان 1:0 ەسەبىمەن باسىم ءتۇستى.