قاناتقا الۆارەس سەكىلدىلەرمەن شايقاسىپ، جەڭىلىپ قالعان الدەقايدا ابىرويلى بولار ەدى - نەسىپ جۇنىسبايەۆ

نۇر-سۇلتان. قازاقپارات - جەڭىلمەي كەلە جاتقان قانات يسلامعا بەلگىلى سپورت جۋرناليسىنىڭ مۇلدەم كوڭىلى تولمايدى.

سەبەبى ول ءالى لايىقتى قارسىلاسقا كەزىكپەي ءجۇر دەپ پايىمدايدى. بۇل تۋرالى تانىمال سپورت جۋرناليسى نەسىپ جۇنىسبايەۆ الەۋمەتتىك جەلىگە جازدى.

«قاناتجان-اۋ، قارسىلاسىڭدى تاڭداساڭشى!!!»- دەپ باستاپتى سپورت جاناشىرى.

جۇما، سەنبى كۇندەرى ەكى ۇلكەن وقيعاعا كۋا بولدىم تەلەجاشىك ارقىلى. ءبىرىنشىسى قانات يسلام بالامىز باس كەيىپكەر بولعان كاسىپقوي بوكس كەشى دە، ەكىنشىسى، ديماش قۇدايبەرگەننىڭ «ارناۋ» اتتى كونسەرتى. قاناتتىڭ جەڭىسىنە قۋاندىم. ءبىراق ونى كاسىپقوي بوكس سوقپاعىمەن جەتەكتەپ كەلە جاتقان جانداردىڭ بارىنە زىعىردانىم قايناپ وتىر. مەن قاناتتى 2008 -جىلعى پەكين وليمپياداسىندا كورىپ، بوكسىنە ريزا بولىپ، كەيىن ەلگە كەلگەندە جاقىن تانىسىپ، بىلگەن اقىلىمدى ايتقان اعاسىمىن...

بىردە ول الەۋمەتتىك جەلىدە؛ «گولوۆكين - قازاق، ءبىز ەكەۋمىز جۇدىرىقتاسپايمىز!» دەگەن وي ايتتى. مەن ءبىر كەزدەسكەندە؛ «قاناتجان، ونداي پاتريوتتىق جاقسى-اق، ءبىراق جەمە-جەمگە كەلگەندە مىقتىنى انىقتاۋ كەرەك بولسا گولوۆكينمەن شىعۋ كەرەك!» دەدىم. بوتەن ويلاپ قالماڭىزدار. مەن بىلەتىن سپورتتا، ونىڭ ىشىندە كاسىپقوي بوكستە جەرلەستىك، ۇلتتىق بەلگى دەگەن بولماۋى كەرەك! مەكسيكا ەلىنىڭ كاسىپقوي بوكسشىلەرى ءبىرىن-ءبىرى ۇتپاي، ۇلكەن شايقاستارعا جەتە المايدى. راس، بىرگە تۋىپ، ءبىر ەمشەكتەن ەمىسكەن ەگىز كليچكولاردى ءبىر-بىرىمەن شايقاسپايمىن دەسە تۇسىنۋگە بولادى. ال باستى ماقساتى كاسىپقوي بوكستىڭ شىڭىنا شىعۋ بوپ تابىلاتىن بۇل ونەردە تۋىسقاندىق دەگەن اتىمەن بولمايدى!

نە ايتقالى وتىرمىن؟ سول پەكين وليمپياداسىندا كورگەن قانات بالامىز مەن كۇتكەن شىڭىنا ءالى شىققان جوق. ويتكەنى ونى ءوز سالماعىنداعى مىقتىلارعا سالماي كەلەدى. سوناۋ جەر تۇبىنەن الماتىعا كەلىپ ءتۇرىپ، ءبىرىنشى راۋندتىڭ 14-سەكۋندىندا مۇرتتاي ۇشاتىن بوكسشى كىمگە ابىروي؟ سول ءۇشىن دە قاناتتى اسپانعا كوتەرۋ كەرەك پە؟ بۇل - وزەگىمىزدى جارىپ شىققان ءوز بالامىزعا جاساعان كوز بايلاۋ، وتىرىك ماقتاۋ جانە ونى شىندىقتان اداستىرۋ بوپ تابىلادى.  ارينە، بۇعان قانات كىنالى ەمەس. وعان قارسىلاس تاۋىپ، بەتتەستىرىپ وتىراتىن كومانداسى. رەنىش سولارعا. ال بۇگىندە وتىزدىڭ ورتاسىنا كەلگەن قانات اينالايىن مىقتىلارمەن قاشان شايقاسادى؟ شايقاسىپ ۇلگەرە مە؟ الدە ونىڭ كومانداسى سەكىلدى بىزگە دە جەڭىلمەگەن دەگەن جەلپىلدەك اتاق جەتە مە؟ سوندا كىمنەن جەڭىلمەگەن؟

كەشەگى ءوزىن كورمەك تۇگىلى اتىن دا ەستىمەگەن دومينيكان رەسپۋبليكاسىنان كەلگەن بوكسشى سەكىلدى بوقكەۋدەلەردەن بە؟

مەنىڭ ويىمشا، ودان دا الۆارەس سەكىلدىلەرمەن شايقاسىپ، جەڭىلىپ قالعان الدەقايدا ابىرويلى بولار ەدى. ارينە، قاناتقا الۆارەستى ەرتەڭ ەشكىم بەرمەيدى. سوندىقتان دا قارسىلاستىڭ ەڭ اۋىرىن، ەڭ شەبەرىن تاڭداپ، كەسكىلەسۋ كەرەك بۇل ونەردە.

سوندا عانا كۇشتىدەن كۇشتىگە ورلەيسىڭ. ال، وسى كۇيىمەن جەڭىلىسسىز اياقتاعاندا نە ابىروي كاسىپقويلىق عۇمىرىنا؟ جەڭىلمەگەندەرىنىڭ ىشىندە ءبىر جەڭىلۋگە لايىق بوكسشى بولماسا؟! كاسىپقوي بوكس ويىنشىق ەمەس. مەنى دە ءوزى جەڭە الاتىنداي سايراپ وتىر دەپ اعاش اتقا مىنگىزەتىندەر تابىلادى. ەشكىمنىڭ اۋزىن جاپپايمىن. مەنىڭ ۇلى ماقساتىم - اسا تالانتتى بولعان قانات يسلام بالامدى كاسىپقوي بوكس سەكىلدى جەڭىستى قان مايداندا عانا الا الاتىن ونەردە جالعان قول شاپالاقتاپ، شىندىقتان اجىراتىپ المايىق دەگەن اكەلىك، اعالىق نيەت، تىلەك قانا!!! ...وسى ويلاردى ايتۋ اۋىر بولدى. ديماش بالام جايلى ەرتەڭ جازايىن»، - دەپ اياقتاپتى نەسىپ جۇنىسبايەۆ.

ەسكە سالساق، وتكەن اپتادا قانات يسلام كاسىپقوي بوكستاعى كەزەكتى قارسىلاسىن 14 سەكۋندتا تالدىرىپ، جەڭىسكە جەتكەن بولاتىن.