ەلميرا سۋحانبەرديەۆانىڭ ىسىنە قاتىستى جاڭا دەرەكتەر شىقتى

نۇر-سۇلتان. قازاقپارات - ق ر ءبىلىم جانە عىلىم ۆيتسە-ءمينيسترى بولعان ەلميرا سۋحانبەرديەۆانىڭ ىسىنە قاتىستى جاڭا دەرەكتەر شىقتى.

وعان وزىنە باعىنىشتى ادامداردان پلانشەت پەن ۇيالى تەلەفون تالاپ ەتكەن دەگەن ايىپ تاعىلىپ وتىر، دەپ حابارلايدى قازاقپارات ءتىشىسى.

«2019 -جىلدىڭ مامىرىندا سۋحانبەرديەۆا مانسابىن پايدالانىپ، بىرنەشە ارەكەتتەرگە بارعان. قىزمەت بابىنا سايكەس، ول 1-ماۋسىمدا بالالار قۇقىعىن قورعاۋ كۇنىنە دايىندىققا جاۋاپتى بولعان. وسى شارا اياسىندا ق ر پرەزيدەنتىمەن كوپبالالى جانە از قامتىلعان وتباسىلاردىڭ بالالارى كەزدەسۋ جوسپارلانعان»، - دەدى پروكۋرور نۇرلان بەكماعامبەتوۆ سوت زالىندا.

ونىڭ ايتۋىنشا سۋحانبەرديەۆا اتالمىش كەزدەسۋگە قاتىساتىن بالالارعا پلانشەت، ايپاد جانە سمارتفون سياقتى قىمبات سىيلىقتار تابىستاماق بولعان.

«سۋحانبەرديەۆا ق ر ءبىلىم جانە عىلىم مينيسترلىگىندە بۇل ماقساتقا قاراجات قاراستىرىلماعانىن جاقسى بىلگەن. اعىمداعى جىلدىڭ 3 -مامىرىندا «بالداۋرەن» وقۋ-ساۋىقتىرۋ ورتالىعىندا ەرلىك جاساعان بالالاردىڭ قاتىسۋىمەن جاس پاتريوتتار فورۋمى ءوتتى. وسى شارا بارىسىندا ول ەكى بالاعا 1 -ماۋسىم كۇنى مينيسترمەن كەزدەسۋ كەزىندە iPhonеХ بەرىلەتىنىن ايتقان. سول ءۇشىن مەملەكەتتىك مەكەمە باسشىسىنان ەكى iPhonеХ تالاپ ەتكەن»، - دەدى مەملەكەتتىك ايىپتاۋشى.

پروكۋروردىڭ ايتۋىنشا، سۋحانبەرديەۆا مەملەكەتتىك مەكەمە باسشىسىنىڭ اتالعان زاتتاردى ءوز اقشاسىنا الۋعا ءماجبۇر بولاتىنىن بىلگەن.

«كومەكشىسى مەن حاتشىسى ارقىلى ايتىلعان بۇل تاپسىرما ءمينيستردىڭ بۇيرىعى رەتىندە سيپاتتالعان. مەكەمە ديرەكتورى ءوز تۋىسىنا شىعىپ، كومەك سۇرايدى. ول ءوتىنىشىن ورىنداپ، 636 مىڭ تەڭگەگە ەكى ۇيالى تەلەفون ساتىپ اپەرگەن. سۋحانبەرديەۆاعا ول زاتتار جۇرگىزۋشى ارقىلى جەتكەن»، - دەدى نۇرلان بەكماعامبەتوۆ.

پروكۋرور اتالمىش ىسكە قاتىستى تاعى ءبىر مىسال كەلتىردى.

«1 -ماۋسىمداعى كەزدەسۋلەرگە پرەزيدەنت اكىمشىلىگىنىڭ ماقۇلداۋىمەن 41 بالا بەكىتىلگەن. ولارعا پلانشەت الۋعا بيۋدجەتتەن قارجى بولىنبەگەنىن بىلە تۇرا، وزىنە باعىنىشتى باسپا باسشىلارىنان 41 ايفون تالاپ ەتكەن»، - دەدى مەملەكەتتىك ايىپتاۋشى.

سۋحانبەرديەۆانىڭ قورعاۋشىسى ايگۇل امرەنوۆا ول تەلەفونداردى ايىپتالۋشىنىڭ ءوزى ءۇشىن سۇراماعانىن العا تارتتى.

«قۇرمەتتى سوت، قورعاۋىمداعى ادامنىڭ تەرگەۋ ىسىمەن كەلىسىمگە كەلۋ ارەكەتىن قولدايمىن. ونىڭ اسىراۋىندا كامەلەتكە تولماعان ەكى بالاسى بار ەكەنىن ەسكەرە وتىرىپ، ايىپپۇل كولەمىن قىسقارتۋىڭىزدى سۇرايمىن. مەكەمە باسشىلارىنا ماتەريالدىق شىعىن شەكتىرسە دە، ول قارجىنى وزىنە الماعانىن دا ەسكەرۋىڭىزدى وتىنەمىن. تەرگەۋ كەزىندە ول العان ەكى ايفوننىڭ ءبىرى اتىراۋداعى ورتكە ورانعان ۇيدەن قىزداردى قۇتقارعان بالاعا، ەكىنشىسى نۇر-سۇلتانداعى قۇدىقتان ەكى جاسار ءسابيدى قۇتقارعان بالاعا بەرىلگەنى دالەلدەندى»، - دەدى قورعاۋشى.

ونىڭ سوزىنە قاراعاندا، ەلميرا سۋحانبەرديەۆا بالالارعا ايفون الىپ بەرۋ تۋرالى ويعا «بالداۋرەن» ورتالىعىنداعى كەزدەسۋدەن كەيىن كەلگەن.

«بالالاردان نە قالايتىندارىن سۇراعاندا «ايفون العىمىز كەلەدى» دەگەن جاۋاپتار ايتىلعان بولاتىن. ياعني، ول بۇل جەردە ءوز مۇددەسىن ويلاماعان. ال مەكتەپكە كەلەر بولساق، بۇل جەردە دە ول جەكە باسى ەشقانداي تابىس كورمەگەن. سوندىقتان، ايىپپۇل كولەمىن قىسقارتۋىڭىزدى سۇرايمىن»، دەدى قورعاۋشى.

ايتا كەتەيىك، ەلميرا سۋحانبەرديەۆا سىبايلاس جەمقورلىق كۇدىگىمەن ۇستالدى جانە 2 ايعا قاماۋعا الىندى.

ق ر سىبايلاس جەمقورلىققا قارسى ءىس-قيمىل ۇلتتىق بيۋروسى ەلميرا سۋحانبەرديەۆاعا قاتىستى سوتقا دەيىنگى تەرگەۋ امالدارىن باستادى. بۇگىن سوت وتىرىسى ءوتىپ، ول ءوز كىناسىن مويىندادى.