ترامپ «يادرولىق كەلىسىمدى بۇزعان» يرانعا سانكسيا سالاتىنىن ەسكەرتتى

نۇر-سۇلتان. قازاقپارات - ا ق ش پرەزيدەنتى دونالد ترامپ «تەگەران يادرولىق كەلىسىمدى بۇزسا، يرانعا جاڭا سانكسيالار سالىنىپ، بۇل ەل ودان ءارى الەمنەن وقشاۋلانا بەرمەك» دەپ مالىمدەدى.

بۇل تۋرالى پرەزيدەنت نيۋ-دجەرسيگە ساپارلاپ بارار الدىندا اۋەجايدا جۋرناليستەرگە بەرگەن سۇحباتىندا ايتتى.

«يران ابايلاسا يگى ەدى. ۋراندى بايىتىپ جاتقانىنا ءبىر سەبەپ بار جانە ول جاقسى سەبەپ ەمەس» دەدى ترامپ. ول يراندا يادرولىق قارۋ پايدا بولۋىنا «جول بەرمەيتىنىن» ايتتى.

يران 8- شىلدەدەن باستاپ ۋراندى 3,67 پايىزدان كوپ دەڭگەيدە بايىتا باستايتىنىن مالىمدەگەن. 3,67 پايىزدىق شەك 2015-جىلى قابىلدانعان يادرولىق كەلىسىمدە جازىلعان. تەگەران «ەۋروپا وداعى كەلىسىم اياسىندا مۇددەمىزدى قورعاماعان سوڭ يادرولىق كەلىسىمنەن باس تارتامىز» دەپ مالىمدەگەن.

ا ق ش پەن ەۋروپا وداعى سانكتسيالارىن الىپ تاستاعانىنىڭ وتەۋى رەتىندە يران 2015-جىلى ۋراندى بايىتۋ دەڭگەيىن ازايتۋعا كەلىسكەن. ءبىراق بىلتىر مامىردا ۆاشينگتون تەگەراندى «يادرولىق قارۋ جاساپ جاتىر» دەپ ايىپتاعان. ا ق ش يادرولىق كەلىسىمنەن ءوز بەتىنشە شىعىپ، يرانعا جاڭا سانكسيا سالعان.

«ازاتتىق»