بۇرىنعى پرەزيدەنت تەرگەۋگە شاقىرتىلدى
مينيسترلىك باسپا ءسوز قىزمەتىنىڭ وكىلى كاريم امانكۋلوۆتىڭ ازاتتىقتىڭ قىرعىز قىزمەتىنە حابارلاۋىنشا، اتامبايەۆ كۋاگەر رەتىندە شاقىرتىلعان.
شاقىرتۋدى ميليتسيا قىزمەتكەرى اتامبايەۆتىڭ كوي-تاشتاعى ۇيىنە اكەلگەن. قۇجاتتا اتامبايەۆتىڭ وسى مينيسترلىكتەگى تەرگەۋگە 9- شىلدە تاڭەرتەڭ كەلۋى كەرەك ەكەنى جازىلعان.
الايدا اتامبايەۆ جۋرناليستەرگە «زاڭسىزدىققا جول بەرىپ وتىرعان» قازىرگى بيلىككە سەنبەيتىندىكتەن، تەرگەۋگە بارمايتىنىن مالىمدەدى. ول قۇقىق قورعاۋ ورگاندارىنا سۇراقتارىن ونىڭ زاڭدى وكىلى سەرگەي سلەساريەۆكە جولداۋىن ۇسىندى.
قىرعىزستان ىشكى ىستەر مينيسترلىگى بيىل جىل باسىندا قىلمىس الەمىنىڭ اتىشۋلى وكىلى ازيز باتۋكايەۆتىڭ تۇرمەدەن بوساپ شىعۋىنا قاتىستى قىلمىستىق ءىس قوزعاعان.
27- ماۋسىمدا قىرعىزستان پارلامەنتى المازبەك اتامبايەۆتى ەكس-پرەزيدەنت جانە تيىسپەۋشىلىك ستاتۋستارىنان ايىردى. وعان دەپۋتاتتاردىڭ تاققان ايىبى مەن، سول ايىپتى پروكۋراتۋرانىڭ قولداۋى سەبەپ بولدى.
25- ماۋسىمدا باس پروكۋرور وتكۋربەك دجامشيتوۆ پارلامەنتتە، 2013-جىلى اتامبايەۆ باتۋكايەۆتى بوساتۋ تۋرالى تاپسىرمانى ءوزى بەرگەنىن مالىمدەدى.
اتامبايەۆتىڭ ءوزى جانە ونىڭ جاقتاستارى مۇنىڭ بارلىعىن «قارالاۋ» مەن قازىرگى بيلىكتىڭ «ساياسي باسەكەلەسىنەن قۇتىلۋدىڭ امالى» دەپ باعالاپ وتىر. اتامبايەۆتىڭ ونداعان جاقتاستارى 22- ماۋسىمنان بەرى ونىڭ كوي-تاشتاعى ءۇيىنىڭ ماڭىنان لاگەر قۇرىپ، شتاب اشقان.
ال 3- شىلدەدە بىشكەكتە المازبەك اتامبايەۆتىڭ جاقتاسى نارازىلىق شاراسىن وتكىزىپ، قازىرگى بيلىكتىڭ وتستاۆكاعا كەتۋىن تالاپ ەتتى. بۇل شاراعا اتامبايەۆتىڭ ءوزى دە قاتىسقان.
«ازاتتىق»