مەسسي ەكى جىلعا فۋتبولدان شەتتەتىلۋى مۇمكىن

نۇر-سۇلتان. قازاقپارات - الەمگە ايگىلى اياقدوپشى ليونەل مەسسي ەكى جىلعا ارگەنتينا قۇراماسىنىڭ ويىندارىنان شەتتەتىلۋى مۇمكىن.

تانىمال شابۋىلشى وڭتۇستىك امەريكا فۋتبول فەدەراتسياسىنىڭ جۇمىسىن سىنعا العانى ءۇشىن جازالانۋى مۇمكىن دەپ جازادى eurosport.ru سايتى.

امەريكا كۋبوگى اياسىندا بولعان ارگەنتينا مەن چيلي كوماندالارىنىڭ كەزدەسۋىنەن كەيىن، مەسسي تۋرنير ۇيىمداستىرۋشىلارى مەن تورەشىلەرىن جەمقورلىق ءۇشىن ايىپتاپ، اربيترلەر تەك قانا برازيليا قۇراماسى ءۇشىن جۇمىس ىستەپ جاتقانىن ايتتى.

AS English باسىلىمىنىڭ مالىمدەۋىنشە، مۇنداي ايىپتاۋلارى ءۇشىن جۇلدىزدى ويىنشى قۇراماسى اتىنان ونەر كورسەتۋگە ەكى جىلعا شەتتەتىلۋى مۇمكىن. ەگەر مەسسي شىنىمەن ارگەنتينانىڭ نامىسىن قورعاۋ مۇمكىندىگىنەن ايىرىلسا، ول 2022-جىلعى الەم چەمپيوناتىنىڭ ىرىكتەۋ ويىندارى مەن 2020-جىلعى كوپا امەريكا تۋرنيرىنە قاتىسپاي قالادى.