13:36, 09 - شىلدە 2019 | GMT +5
دەنيس تەن ءىسى: جانار تولىبايەۆا ورتاشا قاۋىپسىزدىك كولونياسىنا قايتارىلماق
نۇر-سۇلتان. قازاقپارات - جوعارعى سوتتىڭ كاسساتسيالىق القاسى باس پروكۋروردىڭ نارازىلىعىن قاناعاتتاندىرىپ، مانەرلەپ سىرعاناۋشى دەنيس تەندى ءولتىرۋ ءىسى بويىنشا سوتتالعان جانار تولىبايەۆانى كولونياعا قايتارۋعا قاۋلى ەتتى دەپ حابارلايدى Sputnik قازاقستان.
قازاقستان جوعارعى سوتىنىڭ كاسساتسيالىق القاسى جانار تولىبايەۆانى كولونياعا قايتارۋدى جانە الماتى سوتىنىڭ بالا تۋۋىنا بايلانىستى كولونيا-قونىستا مەرزىمىن وتەيتىندىگى تۋرالى شەشىمىنىڭ كۇشىن جويۋدى تالاپ ەتتى.
كاسساتسيا شەشىمىنە سايكەس تولىبايەۆا جازاسىن وتەپ جاتقان كولونياعا ورالادى.
ايتا كەتەيىك، 2019-جىلدىڭ ناۋرىز ايىندا سوتتالۋشى جانار تولىبايەۆا بالاسىن بوسانۋىنا بايلانىستى ورتاشا قاۋىپسىزدىك كولونياسىنان ەڭ تومەنگى قاۋىپسىزدىك كولونياسىنا اۋىستىرىلعان ەدى.
ال ونىڭ قورعاۋشىسى امانگەلدى ساريەۆ بالاسىنىڭ ومىرگە كەلۋىنە بايلانىستى جازاسىن وتەۋىن كەيىنگە قالدىرۋدى سۇراعان.
بالانىڭ اكەسى ارمان قۇدايبەرگەن دوسى نۇرالى قياسوۆپەن بىرگە ايگىلى مانەرلەپ سىرعاناۋشىنى ولتىرگەنى ءۇشىن 18 جىلعا باس بوستاندىعىنان ايىرىلدى.