قازاقستاندىقتاردىڭ مەديتسينالىق قۇپيا مالىمەتتەرى الەۋمەتتىك جەلىگە تاراپ كەتتى
وسىعان وراي «دامۋ» اقپاراتتىق تەحنولوگيالار كومپانياسى مالىمدەمە جاسادى، دەپ حابارلايدى قازاقپارات ءتىلشىسى.
«دامۋ» اقپاراتتىق تەحنولوگيالار كومپانياسى اتىنان زاڭدى اۆتوريزاتسيالانعان پايدالانۋشىلار عانا كىرە الاتىن «Damumed» مەديتسينالىق اقپاراتتىق جۇيەسىنەن تۇلعالاردىڭ قۇپيا مالىمەتتەرىن قامتيتىن اقپاراتتاردىڭ تاراعانىن حابارلايدى.
قازىرگى ۋاقىتتا ءبىز قولدانىستاعى زاڭنامالارعا، اتاپ ايتقاندا ق ر- نىڭ اكىمشىلىك قۇقىق بۇزۋشىلىقتار تۋرالى كودەكسى «قۇپيا مالىمەتتەر جانە ولاردى قورعاۋ تۋرالى قازاقستان رەسپۋبليكاسى زاڭناماسىن بۇزۋ» 79-بابىنا جانە ق ر قىلمىستىق كودەكسىنىڭ «اقپاراتتارعا، اقپاراتتىق جۇيەلەرگە نەمەسە تەلەكوممۋنيكاتسيالار جەلىسىنە زاڭسىز ەنۋ» 205-بابى مەن «اقپاراتقا زاڭسىز يەلىك ەتۋ» 208-بابىنا سايكەس تىڭعىلىقتى تەكسەرۋ جۇرگىزۋ ءۇشىن قۇقىق قورعاۋ ورگاندارىنا بەرۋگە ماتەريال دايىنداپ جاتىرمىز»، - دەپ اتاپ وتەدى كومپانيا Facebook-تەگى رەسمي پاراقشاسىندا.
كومپانيانىڭ مالىمەتىنشە، Facebook تە سكرينشوتتاردىڭ جاريالانۋىنا ەش الاڭداۋدىڭ قاجەتى جوق. مەديتسينالىق مالىمەتتەر تەك اۆتوريزاتسيالانعان تۇلعالارعا عانا قولجەتىمدى. ال الەۋمەتتىك جەلىگە تارالعان مالىمەتتەر زاڭسىز جولمەن الىنعان جانە ولاردىڭ ارەكەتتەرىنە جوعارىدا اتالعان قىلمىستىق زاڭناما نورمالارىنا ساي باعا بەرىلەدى.