پرەزيدەنتتىڭ توراعالىعىمەن ۇكىمەتتىڭ كەڭەيتىلگەن وتىرىسى وتەدى
بۇل تۋرالى ق ر ۇكىمەتىنىڭ وتىرىسىندا پرەمەر-ءمينيسترى اسقار مامين ءمالىم ەتتى، دەپ حابارلايدى قازاقپارات ءتىلشىسى.
«قاراپايىم زاتتار ەكونوميكاسىن» دامىتۋ ارقىلى جاڭا جۇمىس ورىندارىن قۇرىپ، شاعىن جانە ورتا بيزنەستى دامىتۋ، حالىقتى جۇمىسپەن قامتاماسىز ەتۋ ماسەلەلەرىن شەشۋگە تىرىسۋ كەرەك. ناتيجەسىندە، مۇنىڭ بارلىعى مەملەكەتىمىزدىڭ ەكونوميكاسىنا اسەرىن تيگىزەدى. «قاراپايىم زاتتار ەكونوميكاسى» جوبالارىنا قاتىستى ماقۇلدانعان جوبالار بويىنشا، سونداي-اق ەكىنشى دەڭگەيلى بانكتەردىڭ قاراۋىندا جاتقان جوبالار تۇرعىسىندا اقمولا، ماڭعىستاۋ، پاۆلودار، قىزىلوردا، تۇركىستان وبلىستارى جۇمىسى جاقسى جولعا قويعان. اتىراۋ، قوستاناي، باتىس قازاقستان وبلىستارى، نۇر-سۇلتان قالاسى ازىرگە قالىس كەلە جاتىر»، - دەدى ول.
وسى ورايدا ۇكىمەت باسشىسى اتالعان وڭىرلەردىڭ اكىمدەرى ءتيىستى شارالاردى اتقارۋ كەرەكتىگىن، ياعني حالىق تۇتىناتىن تاۋارلار ءوندىرىسىن ۇلعايتۋ بويىنشا قاجەتتى قادامداردى ىسكە اسىرۋعا ەكپىن قويۋ ماڭىزدىلىعى اتاپ ءوتىلدى.
«بيزنەس قوعامداستىق پەن مەملەكەتتىك ورگانداردىڭ ۇسىنىستارىن ەسكەرە وتىرىپ، «قاراپايىم زاتتار ەكونوميكاسى» جوبالارىن دامىتۋ ءۇشىن جەڭىلدىكتى قارجىلاندىرۋ شارتتارى وزگەرتىلەدى، پايىزدىق مولشەرلەمەسى التى پايىزعا دەيىن تومەندەتىلدى. قارىزدى تولەۋدىڭ جەڭىلدىكتى كەزەڭى ەنگىزىلدى. شىعارىلاتىن ءونىمنىڭ 45 جاڭا ءتۇرى قوسىلدى. قابىلدانعان شارالار ءبىرشاما كومپانيالارعا جەڭىلدىكتى قارجىلاندىرۋ مۇمكىندىگىن بەرەدى»، - دەدى ا. مامين.
«وسى قارقىندى ودان ءارى ارتتىرۋ ماقساتىندا ۇلتتىق ەكونوميكا مينيسترلىگى مۇددەلى مەمورگاندارمەن، ۇلتتىق بانكپەن، قارجىگەرلەر قاۋىمداستىعىمەن جانە «اتامەكەن» پالاتاسىمەن بىرلەسە ايتىلعان ۇسىنىستاردى ەسكەرە وتىرىپ، ون كۇن مەرزىمدە ءتيىستى ۇكىمەت شەشىمىنىڭ جوباسىن ازىرلەسىن. اۋىل شارۋاشىلىعى مينيسترلىگى قارجى مينيسترلىگىمەن جانە مۇددەلى مەملەكەتتىك ورگاندارمەن بىرگە اۋىل شارۋاشىلىعى ونەركاسىبى كەشەنى جوبالارىنىڭ اينالىم قاراجاتىن تولىقتىرۋ ءۇشىن سۋبسيديالاردى ۇلعايتۋعا قاراجات ءبولۋ ماسەلەسىن قاراستىرسىن»، - دەپ تاپسىردى ۇكىمەت باسشىسى.
مۇنىمەن قوسا، ورتالىق جانە جەرگىلىكتى اتقارۋشى ورگاندارعا، باسقارۋشى حولدينگتەرگە «قاراپايىم زاتتار ەكونوميكاسىنىڭ» سالالارىن دامىتۋدىڭ جول كارتالارىنا سايكەس، ساتىپ الىناتىن وتاندىق تاۋارلارى مەن قىزمەتتەرىندە جەرگىلىكتى قامتۋ ۇلەسىن ۇلعايتۋ بويىنشا ك ر ى- عا قول جەتكىزۋدى قامتاماسىز ەتۋ جۇكتەلدى.
«كەلەسى دۇيسەنبى كۇنى مەملەكەت باسشىسىنىڭ توراعالىعىمەن وسى ماسەلە ۇكىمەت وتىرىسىندا قارالاتىن بولادى. اكىمدەر ەسەپ بەرۋگە دايىن بولۋى كەرەك.
«قاراپايىم زاتتار ەكونوميكاسىن» دامىتۋ باعدارلاماسى كاسىپكەرلىكتى دامىتۋدىڭ جانە جۇمىسپەن قامتاماسىز ەتۋدىڭ ماڭىزدى قۇرالى. جوبالاردىڭ ءبارى وڭىرلەردە ىسكە اسىرىلادى. اكىمدەر باعدارلامانى ىسكە اسىرۋعا بەلسەنە اتسالىسىپ، جاڭا جوبالاردى ۇسىنۋى، ءتيىستى ءتۇسىندىرۋ جۇمىستارىن جۇرگىزۋى كەرەك»، - دەدى ۇكىمەت باسشىسى.