ارىستا قانشا مىڭنان استام قۇرىلىسشى ەڭبەك ەتىپ ءجۇر؟

ارىس. قازاقپارات - بۇگىن ارىس قالاسىندا اتقارىلىپ جاتقان جۇمىستار، قالانىڭ قازىرگى جاي-كۇيى تۋرالى بريفينگ ءوتتى.

جيىندا شاھار باسشىسى مۇرات قادىربەك قۇرىلىس جۇمىستارى تالاپقا ساي جۇرگىزىلىپ جاتقانىن مالىمدەدى، دەپ حابارلايدى وبلىس اكىمىنىڭ باسپا ءسوز قىزمەتى.

«ارىس قالاسى كۇندەلىكتى قالىپتى ومىرگە ورالىپ كەلەدى. 3 مىڭنان استام قۇرىلىسشى جۇمىس ىستەپ جاتىر. ولاردىڭ اراسىندا جەرگىلىكتى تۇرعىندار تارتىلعان. قازىرگى تاڭدا 340 تاي ءۇي جوندەلدى. ۇكىمەت تاراپىنان ارىستىڭ ءاربىر تۇرعىنىنا 100 مىڭ تەڭگە بەرۋ جونىندە قاۋلى قابىلدانعان بولاتىن. قازىردىڭ وزىندە ارىستىقتاردىڭ 90 پايىزدان استامى وسى كومەككە قۇجات تاپسىردى. تاياۋدا بارلىق تۇرعىننىڭ قۇجاتى جينالادى، ياعني، بۇل جۇمىس اياقتالۋعا جاقىن تۇر»، - دەدى ول.

ق ر قورعانىس مينيسترلىگىنىڭ وكىلى قايىرگەلدى حۋساينوۆ قالا اۋماعى مەن اسكەري قويمادان 20 شاقىرىم راديۋس قاشىقتىقتا تەكسەرۋ، تازالاۋ جۇمىستارى جۇرگىزىلىپ جاتقانىن، رادياتسيا قاۋپى جوق ەكەنىن باياندادى. سونىمەن بىرگە قالادان 60 شاقىرىم قاشىقتىقتا وق-دارىلەردىڭ جارىلماعان جالعىز بولشەكتەرىن جويۋ بويىنشا جوسپارلى جۇمىس اتقارىلۋدا. ساعات تاڭعى 9 بەن 18.00 ارالىعىندا جارىلىس دىبىستارى ەستىلۋى مۇمكىن جانە ول تۇرعىندار ءۇشىن قاۋىپسىز ەكەنىن جەتكىزدى.

ال تۇركىستان وبلىسى پوليتسيا دەپارتامەنتى اكىمشىلىك باسقارماسىنىڭ باسشىسى الماسحان تاستانبەكوۆ قالا اۋماعىندا ءتارتىپ ساقشىلارى تۇراقتى جۇمىس جۇرگىزىپ جاتقانىن، تۇرعىنداردىڭ قۇقىعىن قورعاۋ جانە قوعامدىق قاۋىپسىزدىكتى ساقتاۋ باعىتىندا جۇمىستار جولعا قويىلعانىن اتاپ ءوتتى.

تۇرعىندارعا جالعان اقپارات تاراتۋ جانە ارانداتۋ بويىنشا 10 ادام تەرگەلگەنىن، دالەلسىز دەرەك تاراتۋ قىلمىس ەكەنىن جانە مۇنداي قىلمىسقا بارعاندار زاڭ الدىندا جاۋاپ بەرەتىنىن ايتتى.